काठमाडौं । वाणिज्य बैंकहरुले मंसिरमा निक्षेपको ब्याजदर नबढाउने भएका छन् । मंगलबार बिहान बसेको नेपाल बैंकर्स संघको बैठकले मंसिरमा निक्षेपको ब्याजदर स्थिर राख्ने निर्णय गरेको हो ।

हाल देशको अर्थतन्त्रको सूचकहरु स्थिर रहेकोले ब्याजदर बढाउन वा घटाउन आवश्यक नरहेकोले निक्षेपको ब्याजदर स्थिर राख्ने निर्णय भएको बैंकर्स संघका उपाध्यक्ष सुनिल केसीले बताएका छन् । ‘मुख्य आर्थिक सूचक र मुद्रास्फिति यथावत् ठाउँमा छ’, उनले भने, ‘त्यसैले मंसिरमा ब्याजदर स्थिर राख्ने निर्णय भएको छ ।’ यद्यपी मौद्रिक नीतिको पहिलो त्रैमासिक समिक्षाले लिने लक्ष्य अनुसार पुषमा भने ब्याजदर बढ्न वा घट्न सक्ने केसीले बताएका छन् ।

तरलता व्यवस्थापनका लागि भन्दै वाणिज्य बैंकहरुले ६ महिनापछि गत असोजमा १० प्रतिशतका दरले निक्षेपको ब्याजदर वृद्धि गरेका थिए । भदौसम्म व्यक्तिगत मुद्दती निक्षेपमा ११.०३ प्रतिशत तथा संस्थागत मुद्दती निक्षेपमा ९.०३ र बचतमा न्युनतम ६.०३ देखि अधिकतम ९.०३ प्रतिशत ८.०३ प्रतिशत ब्याजदर रहेको थियो ।

असोजमा १० प्रतिशतका दरले वृद्धि भएर व्यक्तिगत मुद्दती निक्षेपको ब्याजदर १२.१३३ प्रतिशत तथा बचतको न्युनतम ७.१३३ र अधिकतम ९.१३३ प्रतिशतसमम पुगेको छ । कार्तिकमा असोजकै ब्याजदर प्रकाशित गरेका बैंकहरुले मंसिरमा पनि सोही क्रमलाई निरन्तरता दिने भएका हुन् ।