काठमाडौं । हिमालय एयरलाइन्सले कार्तिक १७ गतेदेखि गौतमबुद्ध अन्तर्राष्ट्रिय विमानस्थलबाट दैनिक दुईवटा यात्रुवाहक चार्टर्ड उडान सुरू गर्ने भएको छ । एयरलाइन्सले कार्तिक १७ गतेदेखि २४ गतेसम्मका लागि भैरहवा–क्वालालमपुर चार्टर्ड उडान गर्ने भएको हो ।
उडानका लागि एयरलाइन्सले नागरिक उड्डयन प्राधिकरणसँग अनुमति माग गरेको छ । एयरलाइन्सले त्रिभुवन अन्तराष्ट्रिय विमानस्थललाई आधार बेस बनाएर काठमाडौं-भैरहवा-क्वालालम्पुर र क्वालालम्पुर-भैरहवा-काठमाडौंका लागि उडान गर्ने प्राधिकरणले जनाएको छ ।
गौतमबुद्ध अन्तर्राष्ट्रिय विमानस्थललाई पूर्ण रूपमा प्रयोगमा ल्याउन प्राधिकरणले काठमाडौं विमानस्थलबाट हुँदै आएका चार्टर्ड उडान अब भैरहवाबाट गर्नुपर्ने निर्णय गरिसकेको छ ।
प्राधिकरणले नेपाल वायुसेवा निगम र हिमालय एयरलाइन्ससहित तीन विदेशी हवाई कम्पनीलाई वीन्टर सेड्युलअनुसार गौतमबुद्ध विमानस्थलमा दैनिक एक उडान गर्न निर्देशन दिइसकेको छ ।
