काठमाडौं । उपत्यकासहित देशभर बढेको चिसोका कारण आन्तरिक उडान प्रभावित बनेका छन् । केहिदिन यता लगातार चिसो बढेसँगै तराईका अधिकांश जिल्लाहरुमा हुस्सु लागेको छ । हुस्सुकै कारण भिजिविलिटी कम भएपछि आन्तरिकतर्फका सबै उडान प्रभावित बनेका हुन् ।

उडान प्रभावित हुँदा एयरपोर्टमा यात्रुको हरिबिजोग फेरी उस्तै छ । बिहानैको फ्लाईट भन्दै एयरपोर्ट पुग्ने यात्रु दिउँसो हुँदाम्म पनि एयरपोर्टमै हुन्छन् । ‘मौसको खराबीका कारण फ्लाईट डिले हुन गएकोमा क्षमा चाहन्छौँ भनेको सुन्दै घण्टौँ बिताउनुपर्छ’, त्रिभुवन एयरपोर्टमा भेटिएका एक यात्रुले भने, ‘१०-१५ मिनेट भए पनि हुन्थ्यो, यहाँ त घन्टौ यसरी नै बिताउनुपर्छ ।’

अझ अर्का एक यात्रुले त झनै सौर्य एयरलाइन्सको जहाज ६ घण्टा डिले भएको बताएका छन् । बिहीबार काठमाडौंदेखि बिराटनगरसम्मको यात्रामा रहेका ती यात्रुले फ्लाईटको पर्खाइमा दिनै बितेको बताए । ‘खासमा मेरो फ्लाईटको समय बिहान ९ः२५ को थियो, मौसमको खराबीका कारण फ्लाइट दिउँसो ३ः२५ बजे उड्यो’, उनले भने, ‘कुर्दा-कुर्दा एयरपोर्टमा हालत खराब हुन्छ । प्लेनमा छिटो होला भन्दा गाडीमा भन्दा झन ढिलो भयो ।’

यसो त आजभोली दैनिकजसो बिहानको सबै फ्लाइट डिले नै हुनेगर्छ । हुस्सुका कारण बिहानपख तराईका सबै विमानस्थलको उडान प्रभावित हुने त्रिभुवन अन्तराष्ट्रिय विमानस्थलका प्रवक्ता टेकनाथ सिटौलाले बताएका छन् । ‘उडानका लागि भिजिबिलिटी न्यूनतम एक हजार ६ सय मिटर चाहिन्छ’, उनले भने, ‘हुस्सुका कारण आजभोली भिजिबिलिटी १-२ मिटरसम्म झर्छ, त्यसैले उडान प्रभावित हुन्छन् ।’