काठमाडौं । नेपाल सरकारले स्वास्थ्यमा प्रतिकूल असर पर्ने वस्तुको उत्पादनमा लिँदै आएको अन्तःशुल्कमा बियरको योगदान सबैभन्दा ठूलो देखिएको छ ।
आर्थिक वर्ष २०७८/७९ मा सरकारले बियरबाट मात्रै ३१ अर्ब रुपैयाँ अन्तःशुल्क संकलन गरेको छ । यो गत आर्थिक वर्षमा सरकारले संकलन गरेको कुल राजस्वको ३०.०९ प्रतिशत हो । आन्तरिक राजस्व विभागका अनुसार गतवर्ष सरकारले १ खर्ब ३ अर्ब रुपैयाँ राजस्व संकलन गरेको थियो ।
त्यस्तै, सरकारले मदिराबाट २९.५२ अर्थात ३० अर्ब ४१ करोड रुपैयाँ अन्तःशुल्क संकलन गरेको छ । सुर्तीजन्य पदार्थबाट गतवर्ष २४ अर्ब ५६ करोड रुपैयाँ संकलन गरेको सरकारले सोही अवधिमा अन्य औद्योगिक उत्पादनबाट भने १७ अर्ब ५ करोड रुपैयाँ मात्र अन्तःशुल्क संकलन गरेको राजस्व विभागको तथ्यांकमा उल्लेख गरिएको छ ।
