काठमाडौं । विद्युत् आपूर्तिमा आएको समस्याका कारण मनकामना केवलकार अनिश्चितकालका लागि बन्द गरिएको छ । लोडसेडिङका कारण ‘रोप वे’मा क्षति पुग्दा केवल कार बन्द गरिएको अपरेशन एण्ड मेन्टिनेन्स हेड सुनिल कर्मचार्यले बताएका छन् ।
‘अचानक लोडसेडिङ हुँदा केवलकारको प्यानलमा फ्युजहरु जलेका छन्’, उनले भने, ‘मेन्टिनेन्सको काम सुरु भईसकेको छ । तर, कहिलेसम्म बन्छ भन्ने यकिन भने भएको छैन ।’ कर्मचार्यका अनुसार अर्को सूचना जारी नभएसम्मका लागि केवल कार बन्द रहनेछ ।
यता मनकामना केवलकारका डेपुटी जनरल म्यानेजर उज्वल शेरचनले भने आगामी ५ दिनसम्ममा मर्मतको काम सकिने बताएका छन् । मर्मतको लागि निर्माता कम्पनी अष्ट्रियाको डोपलमायरकै प्राविधिक आउनुपर्ने उनले बताए । ‘सकेसम्म केवलकार छिटोभन्दा छिटो सुचारु गर्ने प्रयास रहनेछ’, उनले भने, ‘केवलकार बन्द हुँदा यात्रुमा पर्न जाने असुविधाप्रति कम्पनी गम्भिर छ ।’
