काठमाडौं । नेपाल राष्ट्र बैंकले तरलता व्यवस्थापनका लागि बैंकिङ प्रणालीमा ५० अर्ब तरलता पठाउने भएको छ । राष्ट्र बैंकले साधारण प्रकृतिको रिपोमार्फत ४५ दिनमा परिपक्व हुनेगरी उक्त तरलता पठाउन लागेको हो ।
उक्त रिपो राष्ट्र बैंकले बिहीबार अपराह्न २ बजे बोलकबोल गर्नेछ । बैंकिङ प्रणालीमा लगानीयोग्य रकम अभाव देखिएकाले अल्पकालीन अवधिको तरलता प्रवाह गर्नेगरी रिपो जारी गर्न लागेको राष्ट्र बैंकले जनाएको छ ।
पुसमा आयकरको पहिलो किस्ता भुक्तानी गर्दा बैंकिङ प्रणालीबाट राजस्वको रुपमा ठूलो पैसा जाने भएकाले राष्ट्र बैंकले तरलता पठाउन लागेको हो । बोलकबोलमा ‘क’, ‘ख’ र ‘ग’ वर्गका बैंक तथा वित्तीय संस्थाले भाग लिन पाउनेछन् ।
