">
काठमाडौं । गृहमन्त्रीको पदभार ग्रहण गर्दै रवि लामिछानेले निर्मला पन्तको न्यायका लागि पहल गर्ने प्रतिबद्धता गरेका छन् । पहिलो निर्णयका रुपमा ‘निर्मलाको न्याय’ रहेको भन्दै गृहमन्त्री रवि लामिछानेले वर्षौंदेखि नेपालको कानुनलाई जिस्क्याईरहेको ‘निर्मला पन्त हत्या प्रकरण’को टुँगो लगाउने प्रतिबद्धता गरेका हुन् ।
पदभार ग्रहण गर्दै लामिछानेले आगामी दिनमा गर्नुपर्ने कामको लिखित दस्तावेज भएकोले कार्य सम्पादनमा कतै पनि अलमल नहुने बताएका छन् । ‘हामीले गर्नुपर्ने कामको लिखित दस्तावेज छ’, उनले भने, ‘नातावाद–कृपावादको अन्त्य हुन्छ र जे हुन्छ सबै सिस्टममा हुन्छ ।’
त्यस्तै, गृहमन्त्री लामिछानेले सिस्टमभन्दा बाहिर बसेर काम गर्ने विरुद्ध निर्मम रुपमा प्रस्तुत हुने समेत प्रतिबद्धता गरेका छन् । ‘यो पद र कुर्सीका लागि म भलै नयाँ हुँला तर यो सिस्टमसँग वर्षौंदेखि परिचित छु’, उनले भने, ‘यो कुर्सीमा नेपाली जनताको आशा र भरोसा जोडिएको छ, जुन कुनै पनि हालतमा मर्न दिन्न ।’
‘म सञ्चारकर्मी रहँदा सुशासनका सवालमा खह्रो रुपमा प्रस्तुत भएँ, जसको फलस्वरुप आज म यो स्थानमा छु’, गृहमन्त्री लामिछानेले भने, ‘त्यो स्वभाव अव यो कुर्सीमा रहँदा पनि लागू गर्नेछु ।’
