काठमाडौं । भारत सरकारले पुनः ब्याजदर बढाउने तयारी गरेको छ । भारतीय रिजर्भ बैंक (आरबिआई)ले मौद्रिक नीतिको समिक्षा गर्दै ब्याजदर थप बढाउने तयारी गरेको भारतीय सञ्चार माध्यमले जनाएका छन् ।
प्रत्येक दुई महिनामा हुने मौद्रिक नीतिको समिक्षाका लागि भारतीय रिजर्भ बैंक(आरबिआइ)ले सोमबारदेखि बैठक सुरु गरेको छ । बैठक सकिए लगत्तै आरबिआईले ‘क्रेडिट पोलिसी’ घोषणा गर्नेछ । योसँगै आरबिआईले रिपो रेटमा वृद्धि गर्ने सम्भावना प्रवल देखिएको छ । हाल ५.९० प्रशितशत रहेको रिपो रेटमा यसपाली ०.३५ प्रतिशतले वृद्धि हुनसक्ने जानकारहरु बताउछन् ।
यसअघि गत अप्रिलमा आरबिआईले गरेको मौद्रिक नीतिको समिक्षाका क्रममा रिपो रेट ४ प्रतिशतमा स्थिर थियो । तर, आरबिआइले दुई र तीन ‘मे’ मा रिपो रेट ०.४० प्रतिशत बढाएको थियो । जुनमा बसेको बैठकले पुनः रिपो रेट ०.५० प्रतिशतले वृद्धि गर्दै ४.९० प्रतिशत पुर्याएको थियो ।
आरबिआईले पुनः अगस्टमा ०.५० प्रतिशत बढाउँदै ५.४० प्रतिशतमा पुर्याएको रिपो रेट सेप्टेम्बरमा ५.९० प्रतिशत पुगेको थियो । यसपटकको मौद्रिक नीतिको समिक्षाका लागि बसेको बैठकले पुनः रिपो रेट बढाए यो पाँचौं पटकको वृद्धि हुनेछ ।
