काठमाडौं । सानिमा लाइफ इन्स्योरेन्स कम्पनीको सेयर कारोबार फुकुवा भएको छ ।

नेपाल स्टक एक्चेन्ज (नेप्से) ले सानिमाका आधारभूत सेयरधनीबाहेक अन्य सेयरधनीहरुको सेयर कारोबार फुकुवा गर्ने निर्णय गरेको हो । अव आइतबार मंसिर २५ गतेदेखि इन्स्योरेन्सको सेयर कारोबार पुनः सुरु हुने भएको छ ।

रिलायन्स लाइफ इन्सुरेन्ससँग मर्जर प्रक्रियामा रहेको सानिमाको गत असार २९ गतेदेखि सेयर कारोबार रोक्का रहेको छ । सानिमा र रिलायन्सले असार २९ गते मर्जर सम्बन्धी सहमतिपत्रमा हस्ताक्षर गरेका थिए ।

हाल सानिमा लाइफको २ अर्ब ८ करोड ४० लाख रुपैयाँ र रिलायन्स लाइफको २ अर्ब १० करोड रुपैयाँ चुक्ता पुँजी रहेको छ ।