काठमाडौं । वाणिज्य बैंकहरुले ब्याज घटाउने निर्णय गरेसँगै विकास बैंकहरुले पनि माघ महिनादेखि ब्याजदर घटाउने भएका छन् । बिहीबार बसेको डेभलपमेन्ट बैंकर्स एसोशियसनको बैठकले माघदेखि लागु हुने गरी ब्याजदर घटाउने निर्णय गरेको हो ।
योसँगै अब माघदेखि व्यक्तिगत मुद्धती निक्षेपको ब्याजदर १२.८५ प्रतिशतबाट घटाएर १२ प्रतिशत कायम गर्ने डेभलपमेन्ट बैंकर्स एसोशियसनका अध्यक्ष प्रध्युमन पोखरेलले बताएका छन् । पोखरेलका अनुसार संस्थागत मुद्धतीतर्फ भने हाल कायम रहेको १०.८५ प्रतिशत ब्याज मुद्धती निक्षेपको तुलनामा दुई बिन्दु कम हुनेगरी निर्धारण गरिनेछ ।
यो सँगै फाइनान्स कम्पनीहरुले पनि माघदेखि ब्याजदर घटाउने तयारी सुरु गरेका छन् । बुधबार मात्रै नेपाल बैंकसं संघले माघदेखि ब्याजदर घटाउने निर्णय गरेको थियो ।
