काठमाडौं । आइतबार पोखरामा पुरानो विमानस्थलको पछाडिपट्टीको सेती नदी खोँचमा दुर्घटना भएको विमानमा सवार ७२ जनामध्ये ११ जना विदेशी नागरिक रहेको खुलेको छ ।
अर्थ सरोकार डटकमलाई प्राप्त यात्रु र चालक दलका सदस्य सहितको सूची अनुसार दुर्घटनामा परेको विमानमा ४१ जना महिला र २७ जना पुरुष रहेका छन् । काठमाडौंदेखि पोखरासम्मको यात्रामा रहेको सो विमानमा ११ जना विदेशी नागरिक रहेका छन् । त्यस्तै, सोही विमानमा ३ जना बालबालिकासमेत रहेका छन् ।
काठमाडौंबाट ६८ जना यात्रु बोकेर पोखराका लागि उडेको यति एयरलाइन्सको एन एनसी एटीआर आइतबार बिहान दुर्घटना भएको थियो ।
दुर्घटनाबारे प्राप्त पछिल्लो अपडेट अनुसार हालसम्म ३२ जनाको शव निकालिएको छ भने बाँकीको उद्धार कार्य जारी रहेको छ ।
