काठमाडौं । नागरिक उड्डयन प्राधिकरणले गुण एयरको सम्पूर्ण उडान बन्द गर्न निर्देशन दिएको छ । पाइलट र क्रु मेम्बरलाई तलब नदिएपछि हवाई सुरक्षामा गम्भीर असर पर्ने भन्दै प्राधिकरणले गुण एयरको सम्पूर्ण उडान तत्काल बन्द गर्न निर्देशन दिएको हो ।
उडानमा संलग्न कर्मचारीलाई तलब नदिएको भन्दै एयरलाइन्सप्रति असन्तुष्टि बढ्न थालेपछि उडान बन्द गर्न निर्देशन दिएको प्राधिकरणका प्रवक्ता जगन्नाथ निरौलाकाले बताएका छन् । उनका अनुसार जोखिमलाई मध्यनजर गरेर अर्को व्यवस्था नभएसम्मका लागि गुण एयरका सम्पूर्ण उडान बन्द गरिएको छ ।
गुणका उडान गत बुधबारदेखि नै बन्द भए पनि गुणले जहाज मर्मतका लागि स्पेयर पार्टस् विदेशबाट ल्याइँदै र पाइलट तालिममा रहेकाले उडान बन्द रहेको बताएको थियो । तर, उडान बन्द भएपछि प्राधिकरणले गरेको छानबिनका क्रममा कर्मचारीलाई तलब नदिएको पाइएको प्राधिकरणले जनाएको छ ।
गुण एयरका हाल तीन वटा जहाज सञ्चालनमा छन्। यी जहाजले तुम्लिङटार, पोखरा, विराटनगर, भैरहवा, भरतपुर, सिमरा लगायतका गन्तव्यमा उडान गर्दै आइरहेका छन्।
