काठमाडौं । पछिल्लो समय अनलाइनमार्फत ठगी गर्नेहरु सक्रिय भएका छन् । कहिले ‘नेपाली गर्ल’ त कहिले ‘तपाईलाई चिट्ठा पर्यो’ भन्दै ठगी भएका घटना तपाई हाम्रा लागि नौला रहेनन् । अनलाइन प्रयोगकर्ताको मनोभाव बुझेर ह्याकरहरुले विभिन्न ‘लिंक’ पठाएर ठगी गरिरहेका छन् । यसैबीच ‘कनेक्ट आईपीएस नेपाल’ नामको नक्कली पेज अहिले बजारमा सक्रिय बनेको छ ।

केही दिनयता सामाजिक सञ्जालमा ‘कनेन्ट आईपीएस नेपाल’नामको नक्कली पेज भाइरल छ । यतिसम्म कि यो पेज बनाउने गिरोहले पेज ‘बुस्ट’ गरेर सामाजिक सञ्जाल प्रयोगकर्ताको ‘फिड’मा पुर्याउने प्रयास गरिरहेको छ ।

स्क्यामका रुपमा प्रयोग गरिएको उक्त पोस्टमा क्लिक गर्नासाथ ‘डाउनलोड न्यु डेस्कटप भर्सन अफ कनेक्ट आईपीएस’ भन्ने म्यासेज म्यासेन्जरमा आउँछ । सो म्यासेजमा रिप्लाई गर्नासाथ एउटा लिंक र पासवर्ड आउँछ । तर, यी दुवै पोस्ट र पेजको लिंकमा क्लिक गर्नासाथ ह्याकरले प्रयोगकर्ताको व्यक्तिगत विवरणमा कब्जा गर्छ र बैंक खातामा भएको सबै रकम चोरी गर्छ ।

यता साइबर सुरक्षाका जानकारहरु भने यसको प्रकृति फरक भए पनि विगतमा भएका ठगी जस्तै भएको दाबी गर्छन् । ‘यस्तो ठगी नौलो होइन, केवल प्रकृतिमात्रै फरक हो’, साइबर सुरक्षाका एक अधिकारीले भने, ‘यस्ता स्क्यामबारे प्रयोगकर्ता सचेत हुनुपर्छ, हामीले पनि अनुसन्धान थालेका छौँ ।’