काठमाडौं । नेपाल धितोपत्र बोर्डले ११ ब्रोकर कम्पनीलाई नयाँ शाखा खोल्ने अनुमति दिएको छ । बोर्डले ११ वटा ब्रोकर कम्पनीलाई एकैपटक २० वटा नयाँ शाखा कार्यालय सञ्चालन गर्ने अनुमति दिएको बोर्डका कार्यकारी निर्देशक मुक्तिनाथ श्रेष्ठले जानकारी दिएका छन् ।
बोर्डले धितोपत्र दलाल व्यवसायीले शाखा कार्यालय खोल्ने सम्बन्धी निर्देशिका २०७९ अनुसार शाखा कार्यालय खोल्ने अनुमति दिएको हो । जसमध्ये भृकुटी स्टक ब्रोकिङले सबैभन्दा धेरै ६ ठाउँमा शाखा खोल्ने अनुमति पाएको हो ।
बोर्डले अनुमति दिएका २० शाखामा १० ब्रोकर कम्पनीले यसअघि ब्रोकर कम्पनी नभएको ठाउँमा अनुमति पाएका छन् भने बाँकी भने पुरानै ठाउँमा दोहोरिने छन् । बोर्डको यो अनुमतिसँगै कपिलबस्तुमा नयाँ शाखा थपिने छ भने सर्लाहीको हरिवनका लगानीकर्ताले समेत आफ्नै ठाउँमा ब्रोकरेज सेवा पाउने भएका छन् । बर्दिबास, दमौली, चितवन जिल्लाको पर्सा, सिराहा जिल्लाको मिर्चैया र गोर्खा जिल्लाको गोर्खा बजारमा पहिलो पटक ब्रोकर कम्पनी पुग्ने भएका छन् ।
