काठमाडौं । विदेशमा रहेर आईपीओ भर्न सीआरएन नम्बर लिने नेपालीको संख्या १७ हजार नाघेको छ । सीडिएससीका अनुसार वैदेशिक रोजगारीमा रहेका नेपालीहरुलाई आईपीओमा १० प्रतिशत कोटा दिने नियम लागू भएसँगै विदेशमा सीआरएन नम्बर लिने नेपालीहरुको संख्या बढेको हो ।
सीडीएससीका प्रवक्ता सुरेश न्यौपानेले पनि पछिल्लो समय विदेशमा रहेर सीआरएन लिने नेपालीहरुको संख्या बढेको पुष्टी गरेका छन् । ‘विगतको तुलनामा अहिले ठूलो संख्यामा विदेशी मुलुकमा श्रम गरिरहेका नेपालीहरुले आईपीओ भर्नका लागि सीआरएन नम्बर लिएका छन् । हालसम्म सीआरएन नम्बर लिने विदेशमा रहेका श्रमिकहरुको संख्या १७ हजार नाघेको छ ।’ उनले भने- ‘एक त आईपीओमा १० प्रतिशत कोटा छुट्याएको भएर पनि यसतर्फ चासो बढेको हो । हामीले पनि सूचना जारी गरेर रेमिट्यान्स बचत खाताको आईपीओ भर्न सीआरएन नम्बर लिन समेत अपिल गरिरहेका छौँ ।
यसो त यसअघि वैदेशिक रोजगारीमा रहेका नेपालीहरुलाई रेमिट्यान्स पठाउँदा वैधानिक च्यानलबाट पठाउन प्रोत्साहन गर्ने उद्धेश्यले वैदेशिक रोजगारीमा रहेका नेपाली श्रमिकका लागि आईपीओमा १० प्रतिशत कोटा अनिवार्य गर्नुपर्ने नियम लागू गरिएको थियो । सोही अनुसार कुनै पनि कम्पनीले आईपीओ जारी गर्दा सर्वसाधारणका लागि जारी गर्ने आईपीओमा १० प्रतिशत कोटा विदेशमा रहेर श्रम गरिरहेका नेपालीहरुको लागि अनिवार्य रुपमा छुट्याउनुपर्ने हुन्छ ।
यस्तो कोटामा सहभागी हुनका लागि पहिलो विदेशमा श्रम गरिरहेका नेपालीहरुले श्रम स्वीकृति लिएको हुनुपर्नेछ । दोस्रो, अनिवार्य रुपमा रेमिट्यान्स बचत खाता खोल्नुपर्नेछ र सोही खाताबाट मात्रै आईपीओ भर्न सकिनेछ । र तेस्रो, आईपीओ भर्नका लागि सीआरएन नम्बर लिनुपर्छ । यही कारणले पनि पछिल्लो समय विदेशमा रहेर रोजगारी गरिरहेका नेपालीहरुले सीआरएन नम्बर लिने क्रम बढ्दो छ ।
