काठमाडौं । बैंक तथा वित्तीय संस्थाविरुद्धको आन्दोलनको नेतृत्व गरिरहेका व्यवसायी दुर्गा प्रसाईंले नेपाल बन्दको घोषणा गरेका छन् । बिहीबार काठमाडौंमा पत्रकार सम्मेलन गर्दै थप आन्दोलनका कार्यक्रम घोषणा गरेका प्रसाईंले चैत्र २४ गतेदेखि नेपाल बन्द गर्नेसमेत घोषणा गरेका हुन् ।
प्रसाईंले पत्रकार सम्मेलनबाटै प्रत्येक शनिबार दिउँसो १ बजे मध्यम वर्गका व्यवसायी, यातायात व्यवसायी, घरधनी, सुकुम्बासीहरु र फुटपाथमा व्यापार गर्नेहरुलाई जम्मा गरी माइतीघर मण्डलाबाट जुलुससहित बानेश्वरमा कोण सभा गर्ने घोषणा गरेका छन् ।
त्यस्तै, उनले आन्दोलनको थप कार्यक्रम अन्तर्गत चैत्र १ गतेदेखि १९ गतेसम्म हेटौँडा, पोखरा, जनकपुर, वीरगञ्ज, दार्चुला, बैतडी, महेन्द्रनगर, धरान, विराटनगर, इटहरी र दमकमा वृहत आमसभा गर्ने घोषणा गरेका छन् । योसँगै चैत्र २४ गतेदेखि अनिश्चितकालीन नेपाल बन्द गर्ने, कर नतिर्ने, मालपोतमा जग्गा पास नगर्ने, राँके जुलुस गर्ने लगायतका कार्यक्रम गर्ने प्रसाईंले बताएका छन् ।
प्रसाईंले पत्रकार सम्मेलनमार्फत चैत्र १ गतेदेखि राष्ट्रव्यापी रुपमा महाअभियानको गठन गर्ने लगायतका बिरोध कार्यक्रमको घोषणासमेत गरेका छन् ।
