काठमाडौं । व्यवसायी दुर्गा प्रसाईंले अर्थ सरोकारको नाम नै लिएर अन्य व्यापारीका बारेमा पनि बुझ्न अनुरोध गरेका छन् । बिहीबार काठमाडौंमा आयोजित पत्रकार सम्मेलनलाई सम्बोधन गर्दै प्रसाईंले यस्तो बताएका हुन् ।
बैंक तथा वित्तीय संस्थाविरुद्धको आन्दोलनको नेतृत्व गरिरहेका प्रसाईंले आन्दोलनको थप कार्यक्रम घोषणा गर्ने क्रममा आफूसँगै अन्य ठूला घरानाका ब्यापारीका बारेमा पनि बुझ्न आग्रह गरेका छन् ।
नेपालका सिमित व्यापारीले बैंकिङ प्रणालीबाट ठूलो रकम चलाएकोसमेत प्रसाईंको आरोप छ । ‘ठूला घरानाका व्यापारीको सम्पत्ति खोजिएन बरु मेरो धितो र ऋणको बारेमा खोजी गरियो । मेरो परिवार त हजार वर्षदेखि यहीँ बस्दै आएको परिवार हो तर हिजो आउने व्यापारीले १० हजार करोडको ऋण कसरी पायो ? त्यो चाहीँ अर्थ सरोकारसँग बुझिदिनुहोला ।’ उनले भने, ‘उहाँहरुले मेरो बारेमा त सबै बुझ्नुभएछ तर ठूला घरानाका व्यापारीका बारेमा पनि खोजिदिनुहोला ।’
त्यस्तै, प्रसाईंले चैत्र १ गतेदेखि १९ गतेसम्म देशव्यापी रुपमा आमसभा र विरोध गर्ने र २४ गतेदेखि अनिश्चितकालीन नेपाल बन्द गर्ने घोषणा गरेका छन् । पत्रकार सम्मेलनबाटै प्रसाईंले बैंकहरुले लिलामीका लागि ३५ दिने सूचना निकाल्ने काम तत्काल रोक्नसमेत माग गरेका छन् । पत्रकार सम्मेलनका क्रममा प्रसाईंले बोलेका अन्य अशंहरु भिडियोमा हेर्नुहोस्ः
