काठमाडौं । नेकपा (एकीकृत समाजवादी)का नेता तथा पूर्वप्रधानमन्त्री झलनाथ खनालले मिटरब्याजी पीडितका माग सरकारले पूरा गर्नुपर्ने बताएका छन् । महोत्तरीदेखि हिँडेरै काठमाडौं पुगेका मिटरब्याजी पीडितको आन्दोलनमा पुगेका नेता खनालले यस्तो बताएका हुन् ।

मिटरब्याजका कारण उठीबास लागेको भन्दै न्यायको खोजीका काठमाडौँ पुगेका मिटरब्याजी पीडितका मागप्रति खनालले ऐक्यबद्धता जनाएका छन् । ‘मिटरब्याजी पीडितहरुको माग जायज छन् । मिटरब्याज पीडितमाथि अन्याय भएकै हो ।’, उनले भने, ‘मिटरब्याजका नाममा हुने शोषण सच्चिनुपर्छ । मिटरब्याजी पीडितका माग सरकारले पुरा गर्नैपर्छ ।’

त्यस्तै, नेता खनालले पीडितहरूले चलाएको आन्दोलनलाई आफ्नो पार्टीले समर्थन गर्नेसमेत बताएका छन् । आफ्नो स्तरबाट माग पुरा गर्न सक्दो प्रयास गर्ने आश्वासन दिँदै नेता खनालले मिटरब्याजीहरूले गर्ने शोषणलाई सरकारले अविलम्ब रोक्नुपर्ने बताएका छन् ।

योसँगै उनले जनताका निम्ति ल्याएको परिवर्तन जनताकै हितमा हुने धारणा राखेका छन् । सरकारले माग पूरा गर्ने बचन दिएपछि आन्दोलन स्थगित गर्न समेत नेता खनालले पीडितसँग आग्रह गरेका छन् ।