काठमाडौं । बेला बेलामा समस्या देखिरहने नेपाल टेलिकमको नेटवर्कमा पुनः समस्या देखिएको छ । बुधबार बिहानैदेखि नेपाल टेलिकमको नेटवर्कमा फोन नलाग्ने, लागेपनि स्पष्ट आवाज नसुनिने समस्या देखिँदा फोन सम्पर्कमा कठिनाई भएको छ ।
बुधबार अचानक टेलिकमको भीओएलटीई सेवामा समस्या देखिँदा फोन नलाग्ने समस्या देखिएको नेपाल टेलिकमका प्रवक्ता शोभन अधिकारीले बताएका छन् । ‘नेपाल टेलिकमको टूजी, थ्रीजी र फोरजीमा समस्या छैन तर भीओएलटीईको कोरमा केही समस्या देखिएको हो ।’, उनले भने, ‘यही कारण फोन नलाग्ने समस्या देखिएको हो । समस्या देखिएसँगै समाधानका लागि प्रयासरत छौँ ।’
बिहानैदेखि नेपाल टेलिकमको नेटवर्कमा फोन नलाग्ने समस्या देखिएसँगै सेवाग्राही मर्कामा परेका छन् । नेपाल टेलिकमले २०७८ जेठदेखि फोरजीमा आधारित भ्वाइस ओभर एलटीई सेवाको परीक्षण सुरु गरेको थियो । यो सेवाबाट फोरजी मोबाइलमा हाई डेफिनेसन भ्वाइससहित ग्राहकहरुले सेवामा गुणस्तर थपिने दाबी नेपाल टेलिकमले गरे पनि एकाएक समस्या देखिँदा सेवा प्रभावित बनेको छ ।
नेपाल टेलिकमको सेवामा समस्या आएको यो पहिलो पटक भने होइन । नेपाल टेलिकमको सेवामा पटक-पटक समस्या देखिँदा पनि यसतर्फ टेलिकमको नेतृत्वले चासो नदिँदा ग्राहकहरु मर्कामा पर्दै आएका छन् ।
