काठमाडौं । ‘बैंकको ब्याज मिनाह गर’ भन्दै प्रधानमन्त्री पुष्पकमल दाहाल (प्रचण्ड) विरुद्ध बानेश्वरमा नाराबाजी भएको छ । ५८औँ अन्तराष्ट्रिय जातीय भेदभाव उन्मुलन सार्वजनिक समारोहमा जाँदै गर्दा तीन जना युवाहरुले प्रधानमन्त्रीविरुद्ध यस्तो नाराबाजी गरेका हुन् ।
नाराबाजीकै क्रममा एक युवाले प्रधानमन्त्रीलाई आफ्ना कुरा राख्न पाउनुपर्ने भन्दै आग्रहसमेत गरेका थिए । तर, ती युवालाई प्रहरीले समाउन खोजेपछि उनीहरुले प्रधानमन्त्री दाहालविरुद्ध चर्को नाराबाजी गरेका हुन् ।
नाराबाजी गर्दै गर्दा प्रहरी समातेपछि एक युवाले ‘गरिबमारा प्रचण्ड मुर्दावाद’, ‘मूल्यवृद्धि खारेज गर’, ‘नालायक सरकार होसियार’ लगायतका नारा लगाएका थिए ।
त्यतिमात्र होइन प्रधानमन्त्री प्रचण्ड कार्यक्रमस्थल पुग्दैगर्दा एक युवाले ‘बैंकको ब्याज मिनाहा गर’ भन्दै नाराबाजी गरेका थिए । त्यसलगत्तै प्रहरीले ती युवाको मुख थुनेर नियन्त्रणमा लिएको थियो ।
