काठमाडौं । नक्कली ऋणी खडा गरी ८ करोड बढी रकम अपचल गर्ने आरम्भ लघुवित्त वित्तीय संस्थाका मेनेजर पक्राउ परेको प्रकरणमा कम्पनीका हाकिमहरु पनि तानिएका छन् । नुवाकोटको तादी गाउँपालिका ३ स्थित आरम्भ चौतारी लघुवित्त वित्तीय संस्थामा करोडौं रकम अपचलन गरेको भन्दै प्रहरीले खरानीटार शाखाका शाखा प्रबन्धक विवश पाण्डेलाई पक्राउ गरी मुद्धा दर्ता भएको अवस्थामा यो घटनासँग जोडिएका ३ हाकिमसमेत निलम्बनमा परेका हुन् । उनीहरुमाथि प्रहरीले थप अनुसन्धान गरिरहेको छ ।
निलम्बनमा पर्नेहरुमा जोखिम व्यवस्थापन विभाग प्रमुख युवराज शर्मा पौड्याल, संचालन विभाग प्रमुख सन्तोष थापा, र जनशक्ति व्यवस्थापन सहायक कमल बराल छन् । कम्पनीले आफ्ना कर्मचारीलाई पत्राचार गर्दै उनीहरुलाई सम्पर्क नगर्न र कुनै अफिसियल कारोबार नगर्न समेत निर्देशन दिएको छ ।
उनीहरुलाई निलम्बन गर्दै कम्पनीले संचालन विभागको जिम्मा रिसव थापा र कर्जा विभागको जिम्मा ख्यामकान्त अर्याललाई दिएको छ । यस्तै कम्पनीले असुली तथा आन्तरिक लेखा परिक्षण विभागको जिम्मा बिमल खनाललाई दिएको छ ।
यो कम्पनीभित्र यस्ता थप घोटालाका घटनासमेत भएको दाबी स्वयम् कर्मचारीहरुले गरेका छन् । कम्पनीभित्र यस्ता घोटाला अरु पनि भएको शंकापछि नेपाल राष्ट्र बैंकले पनि कम्पनीका काम कारवाहीलाई सुक्ष्म निरीक्षण गर्न सम्बन्धितलाई निर्देशन दिईसकेको छ ।
