काठमाडौं । अर्थमन्त्री डा.प्रकाशशरण महतले कर्तव्यनिष्ठ भएर काम गर्न र नतिजा देखाउन भन्सारका अधिकारीहरुलाई निर्देशन दिएका छन् । भन्सार विभागद्वारा आयोजित भन्सार व्यवस्थापन गोष्ठीलाई सम्बोधन गर्दै अर्थमन्त्री महतले आफ्नो जिम्मेवारीलाई उच्च प्राथमिकता दिन निर्देशन दिएका हुन् ।
भन्सारमा कडाईका साथ काम गर्नु भन्नुको अर्थ व्यवसायीलाई अनावश्यक दुःख दिनु भन्ने नरहेको अर्थमन्त्री महतको भनाई छ । ‘आयात निर्यातमा संलग्न व्यवसायीलाई अनावश्यक दुःख दिने भनेको होइन ।’, उनले भने, ‘जायज कुराहरु के हुन् ? ती तपाईंहरुलाई नै थाहा छ । तर, कार्यान्वयन भइरहेको छैन । त्यसतर्फ ध्यानाकर्षण गराउन चाहन्छु ।’
त्यस्तै, अर्थमन्त्री महतले आफ्नो नेतृत्वमा अर्थ मन्त्रालय पारदर्शी ढङ्गबाट काम गर्न लागिपरेको दाबी गरेका छन् । ‘जवाफदेही र जिम्मेवार बनाउने परम्पराको सुरुवात गरौँ ।’, उनले भने, ‘धेरै कारणबाट राजस्व घटेको छ । र राजस्व घट्नुमा सबै दोष भन्सारको पनि छैन ।’ योसँगै राजस्व चुहावट रोक्न सुरक्षा निकायसँग पनि गम्भीर छलफल गरिएको बताउँदै अर्थमन्त्री महतले दुवै सुरक्षा निकाय र भन्सार कर्मचारीको समन्वयमा निगरानी गर्न आग्रह गरेका छन् ।
‘धेरै भन्सार नाकाबाट राजस्व सङ्कलन घटेको छ । ती नाकाबाट पनि राजस्व चुहावट भएको खबर छ । भैरहवा, वीरगञ्ज, रसुवा नाकामा पनि त्यस्तै अवस्था छ । यसलाई गम्भीर ढङ्गबाट लिनुहोला ।’,– अर्थमन्त्री महतले भने ।
त्यस्तै, साधारण खर्च धान्न नसक्ने गरी आय घट्नु दुर्भाग्यपूर्ण भएको उल्लेख गर्दै उनले अहिलेको अवस्थालाई राजनीतिक नेतृत्वले उच्च महत्व दिएको बताए । ‘राजनीतिक नेतृत्व यसमा गम्भीर छ । यो गम्भीरतालाई मध्यनजर राखेर जहाँजहाँ समस्या छन् ती समस्यालाई समाधान गर्न हाम्रोतर्फबाट कुनै कसर बाँकी राखिने छैन ।’, उनले भने, ‘उद्योगी व्यवयायीलाई अनावश्यक झन्झट, पीरमर्का परिरहेकाप्रति हामी संवेदनशील छौँ ।’
