">
काठमाडौं । अर्थमन्त्री डा.प्रकाशशरण महत लगानी जुटाउने प्रयासमा जुटेका छन् । सोही क्रममा उनले विश्व बैंकको दक्षिण एसिया क्षेत्रीय उपाध्यक्ष मार्टिन रेजरबीच टेलिफोन वार्ता गरेका छन् ।
क्षेत्रीय उपाध्यक्ष मार्टिनसँग टेलिफोन वार्तामा डेभलपमेन्ट पोलिसी रिभ्यू डिपीसीको प्रभावकारिता र कार्यान्वयनका विषयमा छलफल भएको अर्थमन्त्रीको सचिवालयले जनाएको छ । सचिवालयका अनुसार आगामी जुन महिनामा नेपालमा डिपीसी पुनरावलोकनका सम्बन्धमा पनि थप छलफल हुने भएको छ ।
वार्ताका क्रममा भौतिक पूर्वाधार विकासका लागि विश्व बैंकको नेपालमा धेरै ठूलो लगानीलाई कसरी वृद्धि र प्रभावकारी कार्यान्वयन गराउन सकिन्छ भन्ने विषयमा समेत छलफल भएको बताइएको छ । माथिल्लो अरुण आयोजना सम्पन्न गर्ने विषयमा समेत छलफल भएको र क्षेत्रीय उपाध्यक्ष रेजरबाट सकारात्मक जवाफ आएको सचिवालयले जनाएको छ ।
