काठमाडौं । नयाँ वर्षको सुरुवातसँगै सेयर लगानीकर्ताहरु पनि थप उत्साहित बनेका छन् । लामो समयको विरक्त लाग्दो बजारको घटाइकाबीच नयाँ वर्षको सुरुवातसँगै बजार बढ्ने विश्वाससँगै लगानीकर्ता उत्साहित बनेका हुन् । अझ जानकारहरुले पनि नयाँ वर्षको सुरुवातसँगै बजारमा सकारात्मक लय देखिने बताइरहँदा यसले लगानीकर्तामा थप उमंग थपेको हो ।
यसैबीच सेयर बजारका प्राविधिक विश्लेषक बिमोद देव पन्तले पनि नयाँ वर्षमा सेयर बजार सकारात्मक लयमा देखिने दाबी गरेका छन् । अर्थ सरोकार डटकमको टेलिभिजन कार्यक्रम मार्केट टकमा बोल्दै उनले २०८० साल सेयर लगानीकर्ताका लागि सुखमय हुने बताएका हुन् । ‘बजार जति घट्नु घटिसक्यो, अब यो भन्दा धेरै र विरक्त लाग्दो घटाई बजारमा हुँदैन ।’, उनले भने, ‘नयाँ वर्षले सेयर लगानीकर्तामा छुट्टै उत्साह ल्याएको छ । यो वर्ष बजार सकारात्मक लयमा देख्न पाइन्छ ।’
त्यस्तै, चुकुल एपका संस्थापकसमेत रहेका पन्तले २०८० सालमा एकपटक फेरी बुल आउने दाबी गरेका छन् । ‘२०८० सालमा लगानीकर्ताले एकपटक फेरी बुल देख्न पाउँछन् । यसअघिको बढाईमा सेयरबजारको २२७७ को हाईलाई मार्केटले ब्रेक गर्छ ।’, उनले भने, ‘तर, अघिल्लो पटकको जस्तो ३२०० पुग्नचाहिँ गाह्रो छ । यसको मतलब पुग्दै पुग्दैन भन्ने त होइन, तर २०८० भित्रै त्यो गाह्रो छ ।’
संवादको बाँकी अंश भिडियोमा हेर्नुहोस्ः
