काठमाडौँ । विश्व बैंकको कार्यकारी सञ्चालक समितिले नेपाललाई १० करोड अमेरिकी डलर (हालको दरमा १२ अर्ब ९१ करोड ६३ लाख १० हजार रुपैयाँ) ऋण स्वीकृत गरेको छ । विश्व बैँकका अनुसार ‘नेपाल क्वालिटी हेल्थ सिस्टम्स प्रोग्राम’ अन्तर्गत नेपालको स्वास्थ्य सेवा प्रणालीलाई सुदृढ गर्न उक्त ऋण अनुमोदन गरिएको हो ।
कार्यकमले कोशी र गण्डकी प्रदेशमा स्वास्थ्य सेवाको गुणस्तरमा सुधार ल्याउने, स्वास्थ्य बिमाको कभरेज बढाउने र स्वास्थ्य आपतकालको तयारी तथा प्रतिकार्य गर्न स्वास्थ्य सेवा प्रणालीको क्षमता अभिवृद्धि गर्ने विश्व बैंकको भनाई छ ।
नेपालको स्वास्थ्य क्षेत्रको रणनीतिक योजना, २०२२–२०३० को रणनीतिक उद्देश्यहरु हासिल गर्न संघीयस्तरमा स्वास्थ्य बिमा बोर्ड तथा कोशी र गण्डकी प्रदेशका प्रदेश र स्थानीय सरकारको समन्वयमा स्वास्थ्य तथा जनसङ्ख्या मन्त्रालयले उक्त कार्यक्रम सञ्चालन गर्नेछ ।
जसअन्तर्गत स्वास्थ्य प्रणालीको दक्षता र उत्तरदायित्व अभिवृद्धि, स्वास्थ्यमा दिगो वित्तीय सहायता तथा सामाजिक सुरक्षा प्रवर्द्धन र गुणस्तरीय स्वास्थ्य सेवामा समान पहुँच प्रवर्द्धनलगायत उद्देश्यहरु समावेश रहेका छन् ।
