">
काठमाडौं । वाणिज्य बैंकहरुले ब्याजदर घटाउने भएका छन् । बुधबार बसेको नेपाल बैंकर्स संघको बैठकले नयाँ वर्षदेखि ब्याजदर घटाउने निर्णय गरेको हो ।
योसँगै बैंकहरुले निक्षेपको ब्याजदर एकल अंकमा कायम गरेका छन् । १ वैशखदेखि लागु हुने गरी निक्षेपका नयाँ ब्याजदर १० प्रतिशतभन्दा तल राखेर एकल अंकमा झार्ने निर्णय गरेको एक बैंकका सीईओले बताएका छन् ।
ती सीईओका अनुसार १ वैशाखदेखि व्यक्तिगत मुद्दती निक्षेपको ब्याजदर ९.९९ प्रतिशत र संस्थागत मुद्दती निक्षेपको ब्याजदर ७.९९ प्रतिशत कायम गर्ने निर्णय भएको छ । त्यस्तै, संघको बैठकले साधारण बचतमा न्युनतम ५.४ प्रतिशत र अधिकतम ७.४ प्रतिशत कायम गर्ने तथा कल निक्षेपमा बचतको तल्लो सीमाको ५० प्रतिशत हुन गरी ब्याजदर कायम गर्ने निर्णय गरेको छ ।
