काठमाडौं । नेपाल राष्ट्र बैंकका गभर्नर महाप्रसाद अधिकारीले नेपालको बैंकिङ क्षेत्र सुरक्षित र मजबुत रहेको बताएका छन् ।
मंगलबार चालु आर्थिक वर्ष २०७९÷८० को ८ महिनाको आर्थिक तथा वित्तीय स्थितिसम्बन्धी तथ्यांक सार्वजनिक गर्दै नेपालको बैंकिङ क्षेत्र मजबुत रहेको बताएका हुन् । ‘नेपालको बैंकिङ क्षेत्र बाहिर चलेको हल्लाजस्तो कमजोर छैन । बरु सुरक्षित र थप बलियो छ ।’, उनले भने, ‘बैंकिङ क्षेत्रका सूचकांकहरु मजबुत भएकै कारण सानातिना धक्काले कुनै पनि असर गर्दैन ।’
त्यस्तै, गभर्नर अधिकारीले बैंकको ब्याजदर बजारले निर्धारण गर्ने बताएका छन् । बैंकको ब्याज घट्ने र बढ्ने बजारमा निर्भर हुने बताउँदै उनले राष्ट्र बैंकको काम केही सहजीकरण गरिदिने मात्र भएको बताएका छन् ।
सोही क्रममा गनर्भर अधिकारीले पछिल्लो समय देशव्यापी रुपमा बैंक तथा वित्तीय संस्थाविरुद्ध आन्दोलन चलिरहेको बेला पनि बैंकिङ सेवा प्रवाह गरेको भन्दै कर्मचारीहरुलाई धन्यवाद समेत दिएका छन् ।
