काठमाडौं । अग्रज लगानीकर्ता एवम् इन्भेष्टर फोरमका पूर्व अध्यक्ष छोटेलाल रौनियारले पूँजी बजार सुधारका लागि नयाँ स्टक एक्सचेन्ज अपरिहार्य भएको बताएका छन् । अर्थ सरोकार डटकमको टेलिभिजन कार्यक्रमा मार्केट टकमा कुराकानी गर्दै उनले यस्तो बताएका हुन् ।

आफूहरुले वर्षौंदेखि उठाएको नयाँ ब्रोकर र स्टक एक्सचेन्जको मुद्धा पूरा हँुदा निकै खुसी लागेको रौनियारले बताए । ‘यो माग लगानीकर्ताको वर्षौं पहिलाको हो । यतिसम्म कि मैले नयाँ स्टक र ब्रोकरको लागि पशुपतिनाथमा गएर प्रारथानासमेत गरेको थिएँ । हाल उक्त प्रारथाना पूरा हुँदैछ ।’, उनले भने, ‘नेपालको पूँजी बजार सुधारका लागि यो कोसेढुँगा साबित हुन्छ ।’

त्यस्तै, उनले बजारमा नयाँ स्टक एक्सचेन्ज आउनु भनेको बजार र पुरानो स्टक एक्सचेन्ज सुध्रिनु दुवै भएको तर्क गरेका छन् । ‘नयाँ स्टक एक्सचेन्ज आयो भने पुरानो स्टक एक्सचेन्ज सिद्धिन्छ भन्नू गलत हो, यसले बरु बजारमा प्रतिष्पर्धा गराउँछ । पुरानो स्टक एक्सचेन्ज त झनै सुध्रिने हो, बिग्रिने होइन ।’, उनले भने, ‘सेबोनकै पूर्व अध्यक्ष, नेप्सेकै पूर्व सीईओले पूँजी बजार सुधारका लागि नयाँ स्टक एक्सचेन्ज चाहिन्छ भनेर भन्नुभएको छ । त्यसैले अहिले नयाँ स्टक एक्सचेन्जको विरोध गर्नु भनेको फगत विरोधका लागि विरोध मात्रै हो ।’

यसो त नयाँ स्टक एक्सचेन्जविरुद्धको गतिविधि आजमात्र नभएर विगतदखि नै हुँदै आएको उनको भनाई छ । हिजोका दिनमा एमालेको सरकार हुँदा पनि नयाँ स्टक एक्सचेन्जको विरोध भएको स्मरण गराउँदै उनले यसपाली काँग्रेसले विरोध गर्नु नौलो नभएको बताएका छन् । छोटेलाल रौनियासँग गरिएको थप कुराकानी भिडियोमा हेर्नुहोस्ः