">
काठमाडौं । प्रधानमन्त्री पुष्पकमल दाहाल (प्रचण्ड)सँगको छलफलप्रश्चात लघुवित्त पीडितहरुको अनसन स्थगित भएको छ । प्रधानमन्त्रीसँगको भेट सकारात्मक भएपपछि लघुवित्तविरुद्धको सङ्घर्ष समितिका संरक्षक अगस्त अधिकारीले अनसन स्थगित गरेका हुन् ।
प्रधानमन्त्री प्रचण्डको निर्देशनमा राष्ट्र बैंकले लघुवित्त पीडितका माग सम्बोधन गरिने र छलफलका लागि प्रतिनिधि तोकिने विश्वास दिलाएपछि अधिकारीको अनसन स्थगित भएको हो । लघुवित्तविरुद्धको सङ्घर्ष समितिका अध्यक्ष पुनाराम ज्ञवाली (मनिराम) र ६ वटा किसान सङ्गठन सञ्जालका सदस्यबीच छलफल भएको थियो ।
सङ्घर्ष समितिका पदाधिकारीले प्रधानमन्त्री प्रचण्डलाई उनकै निवास बालुवाटारमा भेटेका थिए । भेटमा प्रधानमन्त्रीले आगामी नीति तथा कार्यक्रममार्फत लघुवित्तसम्बन्धी समस्या नीतिगत रुपमै हल गर्ने र सङ्घर्ष समितिका मागहरुको अध्ययन गरी छलफल अगाडि बढाउने बारे आजै सरकारी प्रतिनिधि तोक्ने बताएका थिए । प्रधानमन्त्रीसँगको छलफलपछि आफूहरुको सङ्घर्षको कार्यक्रम तत्कालका लागि स्थगित भएको ज्ञवालीले जानकारी दिएका छन् ।
यता लघुवित्तविरुद्धको संघर्ष समितिका अध्यक्ष मनिराम ज्ञवालीले भने तत्कालका लागि आमरण अनसन मात्रै स्थगित गरेको बताएका छन् । ‘प्रधानमन्त्रीसँगको भेटपछि तत्कालका लागि आमरण अनसन स्थगित गरेका छौँ । हाम्रो शान्तिपूर्ण आन्दोलन जारी छ ।’, अर्थ सरोकारसँग कुराकानी गर्दै ज्ञवालीले भने, ‘प्रधानमन्त्रीले वार्तामार्फत समस्या हल गर्ने आश्वासन दिनुभएको छ ।’
त्यस्तै, उनले आफूहरुको मागप्रति प्रधानमन्त्री सकारात्मक रहेको उल्लेख गर्दै माग पूरा हुनेमा विश्वास व्यक्त गरेका छन् । माग पूरा नभएको अवस्थामा भने आमरण अनसन बस्ने वा आन्लोदन थप चर्काउने विषयमा भने छलफलपछिमात्रै थाहा हुने ज्ञवालीले बताएका छन् ।
