काठमाडौँ । सेयर लगानीकर्ताले सेयर ब्रोकर अफिसहरुमा तालाबन्दी गर्ने जानकारीपछि बडो फुर्तीका साथ विज्ञप्ति जारी गरेको सेयर दलालहरुको संगठन स्टक ब्रोकर एसोसिएसनको फुर्ती आइतबार विहानै तुहिएको छ । संघका पदाधिकारीसहितको कार्यालयमासमेत लगानीकर्ताहरुले तालाबन्दी गरेपछि संघको फाईफुर्ती तुहिएको हो ।
आइतबार विहानसम्म अधिकांस ब्रोकरका टीएमएस बन्द गराइएका छन् भने धेरै ब्रोकर हाउसहरुमा तालाबन्दीसमेत गरिएका छन् । एकाविहानैदेखि एक जुट भएका लगानीकर्ताहरुले विभिन्न समूह नै बनाएर ब्रोकर हाउस बन्द गराईरहेका छन् । उनीहरुले ठाउँ ठाउँमा खटिने टोली बनाएर ब्रोकरका टिएमएस बन्द गराउने, ब्रोकरका कार्यालयमै तालाबन्दी गर्ने लगायतका काम गरिरहेका छन् ।
यता लगानीकर्ताका अगाडी ब्रोकरहरुको केहि सीप नलागेपछि कतिपय ब्रोकरहरुले भने आफ्नो संघ नै निकम्मा भएको आरोपसमेत लगाएका छन् । ‘अरु के कुरा गर्नु ? पदाधिकारीहरुकै अफिसमा लगानीकर्ताको ताला छ । हाम्रो संघ त पूरै निकम्मा भयो ।’ अर्थ सरोकारसँग कुराकानी गर्दै एक ब्रोकरले भने- ‘अलिकति पनि नैतिकता छ भने हाम्रा अध्यक्षले राजिनामा दिनुपर्छ । यस्तो तात्तो न छारोको अध्यक्षले संघ चल्दैन ।’
