काठमाडौं । अनलाइनमार्फत जुवा खेलाउने कार्यमा संलग्न रहेको आरोपमा राजु पौडेल (राजु मास्टर) पक्राउ परेका छन् । बिहीबार काठमाडौं उपत्यका अपराध अनुसन्धान कार्यालयको टोलीले प्रतिबन्धित ‘वान एक्स बेट’मार्फत सट्टेबाजी गरेको गराएको आरोपमा राजु मास्टरलाई पक्राउ गरेको हो ।

राजु मास्टरसँगै प्रहरीले ‘बल्छी धुव्रे’ भनेर चिनिने मरिचमान श्रेष्ठलाई पनि पक्राउ गरेको छ । ‘बल्छी ध्रुवे’लाई नेपालमा प्रतिबन्ध रहेको ‘वान एक्स बेट’मार्फत सट्टेबाजी गर्ने र त्यसको विज्ञापन गरेको आरोपमा पक्राउ गरिएको हो । यसैक्रममा प्रहरीले बिहीबार राजु मास्टर र बल्छी धुव्रेसहित ८ जनालाई पक्राउ गरेको छ । प्रहरी स्रोतका अनुसार थप अनुसन्धानका लागि अदालतबाट म्याद थप गरेपछि मात्रै पक्राउ परेकालाई सार्वजनिक गर्ने तयारी गरिएको छ ।

उनीहरुविरुद्ध युट्युबमार्फत ‘वान एक्स बेट’को विज्ञापन गरेको आरोप लागेको छ । युट्युबमा पनि उनीहरुले प्रोमो कोड प्रयोग गरी छुट पाउन सकिन्छ भन्दै विज्ञापन गरेको देखिन्छ । बुधबार मात्रै प्रहरीले ‘वान एक्स बेट’मार्फत सट्टेबाजी गर्ने पाँच जनालाई पक्राउ गरी सार्वजनिक गरिएको थियो । उनीहरुले ६३ वटा विभिन्न खाता खोलेर ६४ करोडको कारोबार गरेको प्रहरी अनुसन्धानबाट खुलेको छ ।