">
काठमाडौँ । टोकला चिया लगायतका केहि चलेका ब्राण्डहरुको काम गरिरहेको संस्करण क्रिएसन प्रालि नामक विज्ञापन एजेन्सीले विभिन्न संचारमाध्यमको गोपनियताको खिल्ली उडाउँदै मनपरी गरिरहेको खुलासा भएको छ । सो कम्पनीले एउटा संचारमाध्यमको ‘ब्यालेन्स कन्फरमेसन’ अर्को संचारमाध्यममा पठाएर एकातर्फ संचारमाध्यमको गोपनियताको खिल्ली उडाईरहेको छ भने अर्कोतर्फ अर्को कम्पनीको अनावश्यक सूचना मेलमा पठाएर गलत काम गरिरहेको छ ।
ऋतु मानन्धरका नामबाट आएको मेलमा यसरी विभिन्न संचारमाध्यमको गोपनियता भंग गरिएको हो । यो कानुनी रुपमासमेत गैरकानुनी काम हो भने नैतिक रुपमा पनि गलत काम हो । यसले एकातर्फ मिडिया-मिडियाबीच द्वन्द बढाउने काम गर्छ भने क्लाइण्टसँगको सम्बन्धलाई पनि असर गर्ने सम्भावना रहन्छ । तर यस्तो गम्भीर कुराको सामान्य ख्यालसमेत नगरी ऋतु मानन्धरले पटक पटक विभिन्न संचारमाध्यममा अरुको गोपनियता भंग हुने गरी बदमासी गरिरहेको पाइएको छ ।
‘गल्ती भयो’ : संस्करण क्रिएसन
यता संस्करण क्रिएसन नामको विज्ञापन एजेन्सीकि प्रतिनिधि ऋतु मानन्धरले पनि यस विषयमा आफ्नो गल्ती भएको स्वीकारेकी छिन् । आफुले गरेको गलत कामका कारण एकातर्फ मिडियाको गोपनियता भंग भएको र अर्कोतर्फ एक मिडियाको आर्थिक विवरण अर्को मिडियामा पुग्दा त्यसले गलत प्रभाव पार्ने स्वीकारेकी मानन्धरले यस विषयमा अव आफु सचेत हुने बताएकी छिन् । ऋतु मानन्धरले एउटा इमेलसमेत गतिलोसँग पठाउन नजान्दा अहिले विभिन्न संचारमाध्यमहरुको आर्थिक विवरण अन्यत्रै पुगिरहेको छ ।
के भन्छन् विज्ञापन व्यवसायी र कानुन व्यवसायी ?
यस विषयमा प्रतिक्रिया लिन खोज्दा विज्ञापन एजेन्सी संघ नेपालका अध्यक्ष सोम धितालले भने फोन उठाएनन् । उनले फोन नउठाएपछि हामीले विज्ञापन एजेन्सी संघकै अर्का एक पदाधिकारीसँग यस विषयमा जिज्ञासा राख्यौँ ।
ती अधिकारीले यस्तो काम गर्नै नहुने र गैरकानुनीसमेत रहेको बताए । ‘तपाईंले जे कुरा उठाउनुभयो, त्यो गम्भीर मात्र विषय मात्र होइन, अपराध पनि हो । क्लाइन्टमाथिको धोका हो । तर के गर्नु मै हुँ भन्ने ब्राण्ड त्यस्तै सस्तो कामको पछि लाग्छन्, के गर्नु ?’ नेपाल विज्ञापन एजेन्सी संघका पदाधिकारीसमेत रहेका एक विज्ञापन व्यवसायी भन्छन्- ‘यस विषयमा विज्ञापन संघमा उजुरी गरे हामी सम्बन्धित विज्ञापन एजेन्सीलाई कारवाही गर्छौँ ।’
यता, अधिवक्ता केके न्यौपाने पनि यस्तो काम सार्है गलत र कानुनी रुपमा पनि कसुरजन्य रहेको बताउँछन् । ‘सम्बन्धित संस्थाको अनुमति विना, नियामक वा सम्बन्धित निकायले माग गरेको अवस्थामा बाहेक उसका आर्थिक कारोबार पनि गोप्य हुनु उसको अधिकारको विषय हो ।’ अर्थ सरोकारसँग कुराकानी गर्दै न्यौपानेले भने- ‘अझ प्रतिष्पर्धीलाई जानाकारी हुनेगरी विवरण बाहिरिनु भनेको त सार्है ठुलो र गलत कुरा हो । सम्बन्धित संस्था सो कम्पनीविरुद्ध अदालत गयो भने अदालतले आवश्यक क्षतिपूर्तिसमेत भराउन सक्ने विषय हो यो ।’
