काठमाडौं । नियामक नेपाल धितोपत्र बोर्डले आफ्नौ डाटा सेन्टर स्थापना गर्ने भएको छ । चालु आर्थिक वर्षको नीति तथा कार्यक्रम सार्वजनिक गर्दै आफ्नै डाटा सेन्टर स्थापना गर्ने घोषणा गरेको हो ।
धितोपत्र बजार तथा वस्तु निनिमय बजार सम्बन्धी तथ्यांक र जानकारीहरुको समुचित अभिलेख व्यवस्थापन तथा बोर्डमा प्रयोग भईरहेको र भविष्यमा प्रयोग हुने विभिन्न प्रणालीहरुको व्यवस्थापन गर्न बोर्डले नीति तथा कार्यक्रममार्फत आफ्नै डाटा सेन्टर स्थापना गर्ने घोषणा गरेको हो ।
योसँगै नीति तथा कार्यक्रममार्फत बोर्डले धितोपत्रको दोस्रो बजार कारोबारको भुक्तानी सुनिश्चितताका लागि राफसाफ सुनिश्चितता कोष प्रभावकारी रुपमा सञ्चालन गर्न पनि आवश्यक सहजीकरण गर्ने जनाएको छ ।
त्यस्तै, बोर्डले चालु आर्थिक वर्षमा विकासात्मकतर्फ ३० कार्यक्रम र नियमिततर्फ ४४ कार्यक्रम गरी कुल ४४ कार्यक्रम निर्धारण गरेको छ । जसमा विकासतर्फ गैर आवसीय नेपालीलाई दोस्रो बजारमा खुला गर्न आवश्यक कानुन संशोधन गर्ने जनाएको छ ।
त्यस्तै, धितोपत्र व्यवसायीका लागि संस्थागत सुशासन सम्बन्धी निर्देशिका जारी गर्ने कार्यक्रम पनि बोर्डले नीति तथा कार्यक्रममा राखेको छ । त्यस्तै, हरित वण्ड लगायत नवीन वित्तीय औजार निष्कासनको लागि नियमकानुन बनाउने पनि कार्यक्रममा उल्लेख गरिएको छ भने सेटलमेन्ट ग्यारेन्टी फण्डदेखि एसएमइज प्लेटफर्म सञ्चालनमा ल्याइने कार्यक्रमले यसपटक पनि निरन्तरता पाएका छन् ।
