काठमाडौं । स्ट्याण्डर्ड चार्टर्ड बैंकले नेपाल राष्ट्र बैंकको ब्याजदर नीति उल्लंघन गरेको पाइएको छ । राष्ट्र बैंकको ब्याजदर नीति अनुसार एक पटकमा ब्याजदर १० प्रतिशतभन्दा घटाउन नपाइने भए पनि स्ट्याण्डर्ड चार्टर्ड बैंकले भने त्यो भन्दा बढीले ब्याजदर घटाएको हो ।
बैंकले असार ३१ गते एक सूचना जारी गर्दै नयाँ ब्याजदरबारे जानकारी गराएको थियो । जसअनुसार बैंकले साधारण बचततर्फका एक्सेस प्लस, किडी बैंक, स्ट्यान्डर्ड चार्टर्ड वुमन र सेयरहोल्डर अकाउन्टमा ४.८५ प्रतिशत ब्याजदर सार्वजनिक गरेकोमा साउन १ गते पुनः अर्को सूचना निकालेर ४.९७ प्रतिशत बनाएको छ ।
त्यस्तै, सिनियर सिटिजन र नर्मल सेभिङ खाताको ब्याजदर असार ३१ गते ५.८ प्रतिशत सार्वजनिक गरिएकोमा साउन १ गते सच्याएर ५.९२ पुर्याइएको छ । पे रोल प्लस एकाउन्ट र अमूल्य बचत खातामा बैंकले हिजो ६.४४ प्रतिशत ब्याज दिने जनाएकोमा आज बढाएर ६.५६ र स्पेसल सेभिङ एकाउन्टमा ६.४५ बाट बढाएर ६.५७ बनाइएको छ । बैंकले रेमिट्यान्स सेभिङ एकाउन्टको ब्याजदर पनि बढाएको छ । असार ३१ गते ७.४५ प्रतिशत ब्याजदर सार्वजनिक गरेको बैंकले साउन १ गते ७.५७ पुर्याएको हो ।
