काठमाडौँ । नेपाल प्रहरीको केन्द्रीय अनुसन्धान ब्युरो (सीआईबी)ले पक्राउ गर्न लागेको सूचना चुहिँदा भागेका सिटिजन्स बैंकका ४ कर्मचारीको विवरण पत्ता लागेको छ । त्रिभुवन विश्वविद्यालयको समकक्षता सर्टिफिकेट नक्कली बनाएर जागिर खाएका उनीहरु प्रहरी आफुलाई पक्राउ गर्न आउँदै गरेको थाहा पाएपछि भागेका थिए । प्रहरी स्रोतले दिएको जानकारी अनुसार यसरी भागेका कर्मचारीहरुमा दिपककुमार झा, सुशान्त शर्मा, सुनिता भुसाल र चेतबहादुर थापा छन् ।
उनीहरु सिटिजन्स बैंकले प्राप्ति गरेको तिनाउ मिसन डेभलपमेन्ट बैंकमा काम गरेका थिए । पछि आफ्नो बैंक सिटिजन्स बैंक भएपछि प्रमोसनका बेला सर्टिफिकेट छानविनका क्रममा उनीहरुले नक्कली सर्टिफिकेटका आधारमा जागिर खाएको आशंकामा बैंकले त्रिभुवन विश्वविद्यालयलाई समकक्षता भेरिफिकेसनका लागि पठाएको थियो । त्रिभुवन विश्वविद्यालयले पनि आफ्नो विश्वविद्यालयका नाममा जारी भएको समकक्षता सर्टिफिकेट नक्कली भएको पाएपछि प्रहरीलाई पत्राचार गरेको थियो । त्यसपछि ६ जना पक्राउ परेका थिए भने ४ जना फरार छन् ।
