काठमाडौँ । सहकारी ठग प्रकरणमा केदारनाथ शर्माको बयानमा उनले बैंकबाट ऋण लिँदा ९० लाख घुस बुझाएको आरोप लगाएपछि घुस खाएको आरोप लागेका नेपाल एसबिआई बैंकका ब्रान्च मेनेजर मनोज गौतमले आफुले शिवशिखरका तर्फबाट एक रुपैयाँ पनि घुस नखाएको र आफुले कहिं कतैबाट ऋण दिंदा घुस खाएको प्रमाणित भए आफु जस्तोसुकै सजाय भोग्न पनि तयार भएको बताएका छन् । लामो प्रयासपछि अर्थ सरोकारको सम्पर्कमा आएका उनले सहकारी ठगी प्रकरणमा केदार शर्माको बयानका क्रममा आफ्नो नाम कसरी उल्लेख भयो भन्ने कुराले आफु पनि अचम्मित भएको र सो कार्यले आफ्नो चरित्रहरण हुने काम भएको दाबी गरेका छन् । प्रस्तुत छ अर्थ सरोकारकर्मीले उनै गौतमसँग गरेको कुराकानीको अंश:

१. ऋण दिंदा तपाईंले ९० लाख घुस खानुभएको भन्ने बयान केदार शर्माले प्रहरीलाई दिनुभएको छ, खास कुरा के हो ?
जे जसरी कुरा आयो, त्यो व्यर्थको कुराहरु आयो, जसरी आयो, गलत भयो । मैले हिजो मेरा बारेमा उल्लेखित बयानबारे समाचार आएपछि केदारनाथ शर्मालाई भेट्न पनि गएँ । उहाँले मैले प्रहरीलाई त्यसो भनेकै छैन भन्नुभयो। यसरी कुनै पनि बैंक तोकेर, मान्छे तोकेर मैले कसैको नाम लिएको छैन भन्ने उहाँको कुरा थियो । र, म पनि यहि भन्छु, जे कुराहरु आए, यो सब असत्य हो । यो कुरामा केहि दम भईदिएको भए प्रहरीले मविरुद्ध पनि अनुसन्धान गर्थ्यो होला । अनुसन्धानका क्रममा सीआईबीले मलाई पनि बोलाउँथ्यो होला। मैले घुस लिएको भए मलाई पनि अभियुक्त बनाएर केस फाइल हुन्थ्यो होला नि।

२. केदारनाथ शर्माले नाम नै नलिई हचुवाको भरमा कसरी तपाईंको बैंक, तपाईंको नाम र तपाईंको साखानै यकिन गरेर राख्यो होला र ?
त्यो विषयमा म आफैँ पनि ‘सर्प्राइज्ड’ छु । केदारनाथजीले पनि मैले भनेको होइन भन्नुहुन्छ । अभियोगपत्रमा कसरी मेरो नाम र डिटेल आयो, थाहा छैन ।

३. जसजसको खातामा पैसा हालेर तपाईंले घुस खाएको आरोप छ, यसबारे के भन्नुहुन्छ ? 
यो सब गलत कुरा हो । मैले घुस खाएको र ती खातामा पैसा भएको प्रमाणित भएको भए म यहाँ हुन्थेँ र ? मलाई प्रहरीले समातेर लैजाँदैनथियो र ? त्यत्रो धेरै मान्छेका खाताको स्टेटमेन्ट मागेर प्रहरीले जाँचेको, त्यसमा मेरो कुनै संग्लग्नता भएको भए, मलाई सीआईबीले छोड्थ्यो र ? फागुनबाट अनुसन्धान भईरहेको छ, त्यो अनुसन्धानका क्रममा म दोषी देखिएको भए त मलाई पनि सीआईबीले अनुसन्धानका लागि बोलाउँथ्यो नि, बयानका लागि बोलाउँथ्यो नि । यो त सरासर मेरो चरित्रहरण गर्ने काम भयो । यस विषयमा आज हाम्रो बैंकले कुनै स्टेप लिन्छ ।

४. भनेपछि, तपाईंको खातामा कहिँकतैबाट घुसवापत पैसा आएको छैन ?
केदारनाथ शर्माको नामबाट, शिखर अर्गनाइजेसनका नामबाट, शिखर ग्रुपको नामबाट १ रुपैयाँ पनि आएको प्रमाणित भए म जस्तोसुकै सजाय भोग्न तयार छु । यो सब सुनेर, म हिजोबाट स्वयम् पागल भएको छु ।मैले एक रुपैयाँ पनि सो ग्रुपबाट घुस खाएको प्रमाणित भए, म सुली चढ्न तयार छु।

५. सो ग्रुपबाट कि कसैबाट पनि हो घुस नलिएको ?
एक रुपैयाँ पनि सो ग्रुपबाट लिएको देखियो भने मलाई सुली चढाईदिए हुन्छ।

६. तपाईं सो ग्रुपको मात्र कुरा गरिरहनुभएको छ,  सो ग्रुपबाट कि अन्तबाट पनि हो घुस नलिएको ?
अन्त कतैबाट पनि घुस लिएको छैन । घुस लिएको भए आज म बैंकमा रहन्थें र ! बैंकका कर्मचारीले घुस खान्छन् र ? घुस खाएको भए म यो पदमा हुन्छु र ? बैंक छैन ? अनुसन्धान टोली छैन ? नचाहिने आरोप लगाईयो मलाई । चरित्र हत्या गरियो । बैंकमा पनि यस विषयमा छलफल भएको छ। बैंककै नाम पनि बदनाम भएको छ । अव बैंक यो विषयमा कुन तरिकाले अगाडी बढ्छ, त्यो छलफलपछि थाहा हुन्छ ।

७. सीआइबीले हचुवाका भरमा तपाईंको नाम कसरी अभियोगपत्रमा राख्यो होला र ?
अहँ, त्यो मलाई थाहा भएन। त्यो कसरी भयो, के भयो थाहा छैन, तर जो मान्छेले मेरो नाम लिएको भनेर अभियोगपत्रमा तोकियो, उहाँलाई गएर मैले भेटें पनि। उहाँले गएर मैले त्यसो भनेकै छैन भन्नुभएको छ । तपाईंहरु आफैँ गएर पनि उहाँलाई सोध्न सक्नुहुन्छ। मेरा सम्पूर्ण बैंक खाताहरुमा केदारनाथ शर्मा लगायत कसैबाट पनि १ रुपैयाँ जम्मा भएको देखिन्छ भने मलाई सुली चढाए पनि हुन्छ ।