काठमाडौं । नेपाल राष्ट्र बैंकका गभर्नर महाप्रसाद अधिकारीले आफूले हस्ताक्षर गरेको नोट कसैले प्रयोग नगरुन् भन्ने इच्छा व्यक्त गरेका छन् । वित्तीय साक्षरता टेलिभिजन कार्यक्रमको उद्घाटन समारोहलाई सम्बोधन गर्दै गभर्नर अधिकारीले यस्तो बताएका हुन् ।

‘म नेपाली नोटमा हस्ताक्षर गर्नेमध्येको एउटा गभर्नर हूँ । तर, मेरो कामना मैले हस्ताक्षर गरेको नोट फ्रेममा रहोस् भन्ने छ ।’, उनले भने, ‘हाम्रो कारोबार र कारोबारको सेटलमेन्ट डिजिटल होस् । जुन कुरालाई पछिल्लो समाजले प्रयोग गर्दै आईरहेको पनि पाईरहेका छौँ ।’ डिजिटल कारोबारले आर्थिक सुशासन कायम गर्नुका साथै कारोबारलाई पारदर्शि बनाउने समेत गभर्नर अधिकारीले बताएका छन् ।

त्यस्तै, गभर्नर अधिकारीले अघिल्लो वर्षबाट डिजिटल आर्थिक साक्षरताको अभियान पनि सुरु भएको बताएका छन् । फलस्वरुप प्राय नेपालीहरु अहिले मोबाइल बैंकिङ् प्रयोग गर्न सक्ने भएको अधिकारीले बताए ।

योसँगै एक पटक लिएको बैंकिङ कारोबारको दररेट सात वर्षसम्म परिर्वतन नहुने व्यवस्था पनि रहेको तर त्यसलाई मानिसहरुले उपयोग गर्न नसकेको गभर्नर अधिकारीले बताएका छन् ।

‘हामीसँग धेरै प्रकारका उत्पादनहरु छन् । फिक्स रेट एकपटक लिएरको रेट सात वर्षसम्म परिवर्तन नहुने उत्पादनहरु पनि छन् । जसको फिक्स आम्दानी छ, त्यसको लागि फिक्स रेट हुन्छ । हामीले विगत तीन वर्षदेखि लागू भएको विषय हो । जस्तै फिक्स आम्दानी हुनेहरुको भोली व्याजदर बढ्दा तिर्न सक्दैँन् भन्ने अनुमानको आधारमा त्यसको जिम्मेवारी बैंक आफैले लिने गरि बनेको वस्तुहरु पनि छन् तर धेरै कम मान्छेहरुले मात्रै यो प्रयोग गर्नुभएको छ ।’ उनले भने, ‘यो सायद सञ्चार र साक्षरताको कमीले पनि यस्तो हुनसक्छ । एउटा सानो कर्जाको व्याजदरको सन्दर्भमा समेत पनि साक्षरताका क्षेत्र प्रशस्त छन् भने समग्र वित्तीय क्षेत्रमा वित्तीय साक्षरताको अनिवार्य आवश्यकता हामीले देखेका छौ ।’