काठमाडौँ । नेपाल धितोपत्र बोर्ड कर्मचारी युनियनका अध्यक्ष राजु बहादुर जिसीको शैक्षिक योग्यता प्रमाणपत्र (सर्टिफिकेट) नै नक्कली रहेको भन्दै अर्थ मन्त्रालयले कारवाहीका लागि सिफारिस गरेको पत्र यतिबेला चर्चामा छ । नेपाल वित्तीय संस्था कर्मचारी संघमा पुँजी बजारका तर्फबाट निर्वाचित उपाध्यक्षसमेतरहेका उनको सर्टिफिकेट नक्कली भएर पनि कारवाही भोग्नुको साटो उनी लामो समयदेखि बोर्डमा काम गरिरहेको भन्दै चौतर्फी चर्चा छ । बोर्डमा सहायक द्वितीय श्रेणीमा कार्यरत रहेकै बेला उनले भारतको डीएभी डिग्री कलेज, गोरखपुरबाट किनेर ल्याएको बीए (स्नातक) तहको शैक्षिक प्रमाणपत्र छानबिन गर्दा नक्कली भएको खुलासा हुँदा पनि उनीमाथि कारवाही नभएको भन्दै बोर्डमाथि प्रश्न उठाउने काम भएको छ ।
अर्थ मन्त्रालयको पत्रपछि त्यतिबेला माओवादी नेताको पावर लगाएर उनलाई जोगाइएको, र ठुला नेताहरुको लविङमा उनलाई कारवाहीबाट उन्मुक्ति दिईएको चर्चा यतिबेला पनि ताजै छ । नेपाल धितोपत्र बोर्ड कर्मचारी सेवा शर्त नियमावली, २०६८ को दफा १३२ (२) घ मा ‘बोर्डको सेवामा नियुक्त हुने वा बहाल रहने उद्देश्यले नागरिकता, उमेर वा योग्यता ढाँटेको प्रमाणित भएमा त्यसलाई भविष्यमा बोर्डको सेवाको निमित्त अयोग्य नठहरिने गरी सेवाबाट हटाउने वा अयोग्य ठहरिने गरी बर्खास्त गर्ने’ व्यवस्था छ । जिसीलाई यहि नियम अनुसार कारवाही हुनुपर्ने हो । तर कारवाहीबाट उन्मुक्ति पाएर उनी अहिले पनि जागिर खाईरहेको भन्दै उनको तीब्र आलोचना भईरहेको छ ।
के भन्छन् जीसी ?
यस विषयमा हामीले उनै जिसीलाई सोधेका थियौँ । उनले प्रष्ट रुपमा आफुले आईए भन्दा बढी नपढेको र आफ्नो योग्यता अहिले पनि आईए पास मात्र भएको स्वीकारेका छन् । ‘अनि यो नक्कली सर्टिफिकेट कहाँबाट आयो त ?’ अर्थ सरोकारको प्रश्नमा जिसीले भने -‘यसको कहानी अलि लामो छ । २०६६ सालमा हामीले धितोपत्र बोर्डमा ताला लगाएका थियौँ । त्यतिबेला सुरबीर पौडेल अध्यक्ष हुनुहुन्थ्यो । विना दरबन्दी ४७ जना कर्मचारी नियुक्त गर्न खोजे पछी हामीले बोर्डमा आन्दोलन गरेका थियौँ । यति मात्र होइन, सुरबीर सरले अति गरेपछि हामीले उनलाई बोर्डभित्रै थुनेका समेत थियौँ । २०६८ साल भदौतिर बोर्डमा उहाँको कार्यकालको अन्तिम दिन हामीले कालोमोसो लगाउने तयारी पनि गरेका थियौँ । बीचमा तत्कालीन बोर्ड अध्यक्ष र म बीच ठुलो टसल भयो । यहि प्रतिशोध साँध्न मेरो फाइलमा कतैबाट झिकाइएको नक्कली सर्टिफिकेट राखियो र मलाई फसाइयो । मैले खाईरहेको जागिरका लागि त्यतिबेला पनि योग्यता आईए पास मात्र थियो । मलाई ब्याचलरको योग्यता नै चाहिन्न थियो । तर मलाई फसाउन मेरो फाइलमा नियोजित रुपमा सर्टिफिकेट राखियो ।’
उनका अनुसार उनले सरस्वती क्याम्पस, ठमेलबाट आईए पास गरेका हुन् । सुब्बाको जागिर खान अन्त एसएलसी नै योग्यताले पुग्ने भए पनि बोर्डमा आईए चाहिने र आफु सोहि अनुसार जागिर खाईरहेको उनको तर्क छ । माओवादीको नेताको पावर लगाएर कारवाहीबाट जोगिएको आरोप पनि गलत भएको उनको तर्क छ । ‘त्यतिबेला बुराम भट्टराई प्रधानमन्त्री हुनुहुन्थ्यो । म न उहाँको कार्यकर्ता हो, न आफन्त । तर मलाई उहाँको पावर लगाएर जागिरमा बसेको आरोप लगाइयो । अझ खास कुरा त के हो भने मलाई ४ महिना निलम्बनसमेत गरिएको थियो । म मलाई गरिएको कारवाहीविरुद्ध अदालत जाने तयारीमा पनि थिएँ । तर अदालत जाँदा धेरै खर्च पनि हुने, र समयको बर्बादी पनि हुने हुनाले विभागीय कारवाही भोगेर बसें । अहिले पनि बोर्डमा जागिर खाईरहेको छु ।’
‘अनि केस त पुरानो रहेछ, अहिले कसरी चर्चा बढी भयो त ?’ अर्थ सरोकारको प्रश्नमा उनी भन्छन्- ‘अहिले मेरै विभागका साथीभाईहरु मविरुद्ध लागेका छन् । उनीहरुले नै पूरानो फाइलको फोटो अर्थ सरोकारलगायतका मिडियाहरुमा पठाएछन् । मैले यो केसमा क्लीन चिट पाईसकेको छु । तर मलाई यहि नक्कली सर्टिफिकेट बनाएको भनेर बर्षौंदेखि मानसिक यातना दिने काम बोर्डभित्रकै साथीहरुले गरिरहनुभएको छ । मैले गर्दै नगरेको गल्तीको सजाय भोगिरहेको छु ।’