काठमाडौँ । पूर्वअर्थमन्त्री विष्णु पौडेलले हालको सरकारको नेतृत्वमा देशको अर्थतन्त्र लयमा फर्किने कुनै सम्भावना नरहेको दाबी गरेका छन् । मंगलबार काठमाडौंमा आयोजित निजी क्षेत्रसँग नेकपा एमाले विषयक अन्तरक्रिया कार्यक्रममा बोल्दै उनले सरकारले जति प्रयास गरे पनि अर्थतन्त्र लयमा फर्काउन नसक्ने दाबी गरेका हुन् ।
‘यो सरकारको नेतृत्वमा देशको अर्थतन्त्र लयमा फर्किने र देशका आर्थिक क्षेत्रका समस्या समाधान हुने कुनै पनि सम्भावना छैन ।’, उनले भने, ‘जति प्रयास गर्दा पनि अर्थतन्त्रका समस्या बुझ्न पनि सक्दैन । समस्या समाधानका लागि नीतिगत व्यावहारिक निर्णय गर्न पनि सक्दैन ।’
त्यस्तै, उनले निजी क्षेत्रको समस्या समाधानका लागि सरकार सहयोग नबनी बाधक बन्छ भने त्यसलाई पन्छाएर समस्या समाधान गर्नुपर्ने बताएका छन् । ‘निजी क्षेत्रको समस्या समाधानका लागि सरकार सहयोगी बन्दैन भने र समस्या समाधानका लागि बाधक बन्छ भने त्यो बाधा पन्छाएर भए पनि समस्या समाधान गर्नुपर्छ ।’, उनले भने ।
त्यस्तै, उनले ज्ञापनपत्र बुझाएर सरकारले समस्या नदेख्ने भन्दै निजी क्षेत्रलाई सदन र सडकबाट दवाव दिन आग्रह समेत गरेका छन् ।
