लाज पचाउन सर्वाङ्ग नाङ्गो हुनुपर्दैन, छोप्नुपर्ने चीज अलिअलि देखाउनु पनि लाज पचाए नै सरह हो । सिटिजन्स बैंकले पनि समाजमा खर्च गर्नुपर्ने सामाजिक उत्तरदायित्वको पैसाले आफ्नै कर्मचारीहरुलाई चकलेट खुवाएको छ । तीजको अवसरमा महिला कर्मचारीलाई चकलेट र केहि स्वास्थ्य सामाग्रीहरु राखिएको झोला बाँड्नु कुनै अन्यथा होइन, तर सो काम सामाजिक उत्तरदायित्वको पैसाले गर्नुभने अन्यथामात्र होइन खुलेआम भ्रष्टाचार हो ।
बैंकले सामाजिक उत्तरदायित्व भन्दै तीजको अवसरमा आफ्ना महिला कर्मचारीलाई स्यानिटरी प्याड, स्यानिटरी लाइनर, वेट टिस्यु, चकलेट लगायतको गिफ्ट प्याक बाँडेको छ । बैंककि कर्पोरेट कम्युनिकेसनमा कार्यरत कर्मचारी स्मारिका तिवारीले सो उपहार वितरण गर्दा सामाजिक उत्तरदायित्व अन्तर्गतको बजेट प्रयोग भएको पुष्टी गरेकी छिन् । उनको तर्क छ हामी पनि समाजकै मान्छे, हामीलाई आवश्यक पर्ने स्वासथ्य सामाग्री त्यहि बजेटबाट दिन मिलिहाल्यो नि । अनि चकलेट नि ? हाम्रो प्रश्नमा लाजै नमानी तिवारी दिदि भन्नुहुन्छ- त्यो त हल्का मुख मिठा बनाईदिएको नि रे ! भो त अव !! जनताको डिपोजिट राख्ने जनताको बैंकमा यो हदसम्मको मनपरी क्षम्य छ र ? समाजमा खर्च गर्नुपर्ने पैसाले कर्मचारीले मुख मिठा गर्न मिल्छ र ? के यो सिधासिधा भ्रष्टाचार भएन र ?
यता नेपाल राष्ट्र बैंक पनि सामाजिक उत्तरदायित्वको पैसाले चकलेटसहितका सामाग्री त्यो पनि आफ्नै कर्मचारीलाई बाँड्न नमिल्ने बताउँछ । अनि यसरी खुलेआम गलत काम गर्ने बैंकलाई किन कारवाही गर्न ढिलो गरिरहेको छ राष्ट्र बैंकले ! ह्या, तीजका बेलामा बजेट दुरुपयोग नै भए पनि अलि अलि त भयो होला नि, तीजको बेलामा चेलीबेटीले चकलेट खाए त के भो भन्ने तर्क पनि होला । तर प्रश्न बुढी मरी भन्ने मात्र होइन, काल पल्क्यो भन्ने पीर हो ।
सामाजिक उत्तरदायित्वको पैसाले कर्मचारीलाई मिठाई बाँड्ने बैंकले त्यो दशैंमा थुप्रैलाई बाँड्ने गरेको रक्सी पनि कतै त्यहि सामाजिक उत्तरदायित्व भनेर त बाँडेन भन्ने प्रश्न पनि हो । अनि तीजमा मिठाई पनि त्यहि पैसाले बाँड्न पल्केको बैंकले भोलि दशैंमा दारु बाँड्ला, अझ तीजमा दर खुवाउला, तिहारमा सेलरोटी बाँडला, छटमा केरा बाँड्ला ! यसरी त भएन नि, जनताको बैंकमा होइन र ? त्यसैले यो गलत प्रवृति सक्किनुपर्छ, सिटिजन्स बैंक सच्चिनुपर्छ ।
