काठमाडौं । एनआईसी एशिया बैंकबाट दिनदाहाडै ग्राहकको रकम लुटिएको छ । महोत्तरीमा बैंकबाट रकम झिकेर फर्किदै गर्दा गौशाला नगरपालिका ११ भरतपुरका शम्भु महतो र उनकी श्रीमतीको साथबाट फिल्मी शैलीमा ६ लाख ३६ हजार रुपैयाँ लुटिएको हो ।

ओखलढुंगामा रहेका ज्वाइँले एनआइसी एसिया बैंकको गौशाला शाखामा पठाएको रकम झिक्न महतो र उनकी श्रीमती बैंक पुगेका थिए । तर, रकम झिकेर फर्किदै गर्दा अज्ञात युवकले उनीहरुलाई झुक्याएर रकम लुटेको जिल्ला प्रहरी कार्यालय महोत्तरीका प्रमुख तथा प्रहरी उपरीक्षक प्रकाश मल्लले बताएका छन् ।

मल्लका अनुसार मोटरसाइकलमा सवार एक युवकले बैंकमा डकुमेन्टको काम बाँकी छ भन्दै झुक्याएर रकम लुटेका हुन् । ‘बैंकबाट रकम झिकेर फर्किदै गर्दा बीचबाटोमा एक युवकले बैंकको मान्छे हुँ, बैंकमा डकुमेन्टको काम बाँकी छुटेछ भन्दै पैसाको झोला बोकेकी बुढी आमालाई बाइकमा बसाएर लगेछ र पैसा लुटेछ ।’, एसपी मल्ले भने, ‘लुट्ने व्यक्तिको पहिचान खुलेको छैन । अनुसन्धान र खोजीकार्य भइरहेको छ ।’

तर, लुटेवा सवार मोटरसाइकलको नम्बर भने पहिचान भइसकेको प्रहरीले जनाएको छ ।