काठमाडौं । मोरक्कोमा गएको शक्तिशाली भूकम्पमा परी मृत्यु हुनेको २ हजार भन्दा बढी पुगेको छ । शुक्रबार राती गएको ६.८ म्याग्नेच्युट भूकम्पमा परी मोरक्कोमा २ हजार भन्दा बढीले ज्यान गुमाएको मोरक्कोको गृह मन्त्रालयले जनाएको छ ।
मन्त्रालयका अनुसार भूकम्पमा परी कम्तीमा एक हजार ४ सय जना गम्भीर घाइते भएका छन् । भूकम्पमा ज्यान गुमाउने र घाइते हुने आधाभन्दा बढी अल–हौज र ताराउदान्ट प्रान्तका रहेका बताउँदै उक्त मन्त्रालयले मराकेस, अगादिर, कासाब्लाङ्का, और्जाजाटे, चिचौवा, अजिलाल र युसुफिया पनि अधिक प्रभावित भएका जनाएको छ ।
अचानक आएको भूकम्पबाट भयभीत मोरक्कोली मध्यरातमा घर छोडेर भागेका थिए । अहिले पनि अधिकांश घरबाहिर, सडक तथा खुला चौरमा त्रिपाल टाँगेर बसिरहेका छन् । भूकम्पका कारण सयौं संरचनाहरु ध्वस्त भएका छन् भने हजारौँ परिवार विस्थापित भएका छन् । भूकम्पका कारण मोरक्कोमा ठूलो क्षति भएपछि हाल विभिन्न देशहरुले मोरक्कोलाई भौतिक तथा आर्थिक सहयोग गर्ने घोषणासमेत गरेका छन् । मोरक्कोमा भूकम्पले पुर्याएको क्षतिलाई हामीले एजेन्सीका माध्यमबाट तस्विरमा कैद गर्ने प्रयास गरेका छौँ । बाँकी फोटो फिचरमा हेर्नुहोस्ः
