काठमाडौँ । पशुपति मन्दिर परिसरबाट चोरि भएको परशुरामको मूर्ति बेल्जियममा भेटिएको छ । ४० वर्षअघि चोरिएको ११औँ शताब्दीको उक्त मूर्ति बेल्जियमको एक लिलामी गृहमा भेटिएको हो ।
बेल्जियममा भेटिएको उक्त मूर्ति २०२० नोभेम्बरमा युरोपभर अनलाइन कारोबार गर्ने ‘काटाविकी अक्सन’मा बिक्री भएको पाइएको ‘लस्ट आर्टस् अफ नेपाल’ अभियानले जनाएको छ । उक्त अभियानका अनुसार उक्त मूर्ति २०४० सालको आसपासमा पशुपतिनाथ क्षेत्रको रुद्ररागेश्वरबाट चोरिएको थियो ।
राजा महेन्द्रले २०१७ सालमा गठन गरेको उपत्यकान्चल तात्कालीक सुधार समितिमार्फत उपत्यकाका धेरै मठमन्दिरहरुको संरक्षण तथा संवद्र्धन गरिएको थियो । त्यसबेला रद्ररागेश्वरको परशुराम पनि मर्मतसम्भारमा परेको थियो । तर, २०४० सालपछि उक्त परशुरामको मूर्ति एकाएक गायब भएको थियो । जुन मूर्ति हाल बेल्जियममा भेटिएको छ ।
‘लस्ट आर्टस अफ नेपाल’ अभियानका अनुसार बैंककमा बस्ने सम्पदाप्रेमी विद्यार्थी निश्चल श्रेष्ठले पशुपति क्षेत्रबाट हराएको उक्त मूर्ति बेल्जियमको लिलामी गृहमा भएको आधार पत्ता लगाएका हुन् ।
