यतिबेला काठमाडौँको भृकुटीमण्डपमा नाडा अटो शो चलिरहेको छ । बजारमा व्यापक आर्थिक मन्दी चलेका बेला आयोजना भएको यो अटो शोमा नाडाले २ हजार करोडको कारोबार लक्ष लिएको छ । आखिर कस्तो भईरहेको छ त नाडा अटो शो ? के कारोबार लक्ष पूरा हुने संकेत छ ? प्रस्तुत छ अर्थ सरोकारकर्मी सुरज प्याकुरेलले नाडा अटोमोबाइल एसोसिएसनका अध्यक्ष ध्रुब थापासँग गरेको कुराकानीको सम्पादित अंश :

१. यस्तो मन्दीका बेलामा नाडा अटो शोको आयोजना गर्नुभएको छ । अहिले मान्छेसँग पैसा नै छैन भन्छन् । अवस्था कस्तो देखिएको छ ?
अहिलेको स्थिति उत्साहजनक छ । हामीलाई पनि अटो शो कस्तो हुने हो, यस्तो मन्दीका बेला के हुने हो जस्तो लागेको थियो । तर पहिलो दिन नै यतिधेरै सहभागीहरुले शो हेर्नुभयो कि, हामी निकै उत्साहित भएका छौँ । नाडा अटो शोको इतिहासमै सायद पहिलो दिन यति धेरै अवलोकनकर्ता आएको यो पहिलोपटक हो । त्यसमा पनि शो हेर्न आएको बर्ग हामीले खोजेको बर्ग छ । गाडीप्रति इन्ट्रेष्ट भएका मान्छे शो हेर्न आएका छन् । बुकिङ्ग र सोधपुछ निकै उत्साहजनक रुपमा भईरहेको छ । यस्तो मन्दीका बेलामा पनि सोचेभन्दा राम्रो रेस्पोन्स पाउँदा हामी खुसी छौँ ।

२. तपाईंहरुले यसपालीको अटो शोमा २० अर्वको कारोबार पुग्ने प्रक्षेपण गर्नुभयो थियो, सो कारोबार पुग्छ त ?
अहिलेको अवस्था हेर्दा सो टार्गेट सहजै पुग्ने देखियो । बुकिङको स्थिति निकै राम्रो छ । अझै पनि निकै राम्रो संख्यामा सोधपुछहरु भईरहेका छन् । अवलोकनकर्ताले गाडी किन्ने चाहाना व्यक्त गरिरहनुभएको छ । आजकै दिनको स्थिति हेर्दा २० अर्वको कारोबार सहजै हुने देखेका छौँ ।

३. तपाईंहरु अटो व्यवसायीहरुलाई नेपाल राष्ट्र बैंकले सहयोग गरेन भन्ने गुनासाहरु तपाईंहरु नै गरिरहनुहुंच, खास राष्ट्र बैंकले सहयोग नगरेको के कुरामा हो ?
डलर संचिति बढाउने बहानामा नेपाल राष्ट्र बैंकले धेरै कुरामा बन्देज लगायो । नेपाल राष्ट्र बैंकका विभिन्न खाले बन्देजहरुले नेपालको अटो मोबाइल क्षेत्र नै अफ्ट्यारो अवस्थामा पुग्यो । आयात कम होस् भन्ने उद्देश्य राखिए पनि त्यसका अन्य खालका असरहरु पनि थिए । हामीले त त्यतिबेला नै यस्तै अवस्था हो भने कुन दिन ऋण खोजेर कर्मचारीलाई तलव खुवाउनुपर्ने स्थिति आउन सक्छ भनेका थियौँ । अहिले स्थिति कतै त्यस्तै त हुन लागेको होइन भन्ने देखिएको छ । राज्यले अटोमोबाइल क्षेत्रबाट अरवौं राजश्व गुमायो । अझ दु:खको कुरा त के हो भने अहिले स्थिति केहि सहज हुँदा पनि विभिन्न खालका बन्देजहरु खुलाईएन, जसका कारण अटो मोबाइल क्षेत्रमा समस्याहरु बढेका छन् । राष्ट्र बैंकले यसतर्फ सोचिदिए हुन्थ्यो भन्ने हाम्रो अपेक्षा हो ।

४. तपाईंहरु गाडी किन्नेहरुको उत्साहप्रद सहभागीता छ भन्नुहुन्छ, तर भएकै गाडीवालाहरुले पनि समयमा बैंकको किस्ता तिर्न नसकेको कुरा छ नि ?
कोभिडमा विशेषगरी कमर्सियल गाडीहरुमा यस्तो अवस्था आयो । व्यापार नै नभएपछि धेरै गाडी साहुहरुले बैंकको किस्ता तिर्न सकेनन् । अन्य गाडीमा त्यस्तो थिएन । अहिलेचाहिं मान्छेको कमाई नै कम हुँदा केहि समस्या देखिएको छ । पहिला-पहिला त कम डिफल्ट भएको क्षेत्र नै अटो क्षेत्र थियो । पछि कोभिडका कारण र त्यसभन्दा पछि मन्दीका कारण केहि समस्याहरु देखिएको हो ।

५. यस्तो मन्दीका बेलामा पनि किन नाडा अटो शो गर्नुभयो, यो समय ठिक होइन वा थिएन जस्तो लागेन ?
यस विषयमा नाडामा पनि व्यापक छलफल भएको हो । धेरै साथीहरुले यस्तो मन्दीका बेला अटो शो नगरौँ पनि भन्नुभएको हो । तर यो अटो शोले देशको अर्थतन्त्र नै चलायमान गर्न सक्ने सामर्थ्य राख्छ भनेर हामीले अटो शो गर्ने निर्णय गर्यौँ । सुरुमा त हामीलाई पनि के हुने हो, कसो हुने हो जस्तो लागेको थियो । तर पछि बैंकहरुले पनि हामीलाई सहयोग गर्नुभयो । बैंकमा तरलताको समस्या नभएकाले पनि हामीलाई सहयोग नै भयो । त्यसैले अहिलेको अवस्थामा जे भईरहेको छ, हामी उत्साहित छौँ ।