">
काठमाडौं । चाडपर्वको मुखमा कालोबजारी गर्ने काठमाडौंको सबैभन्दा ठूलो गृहेश्वरी ट्रेडलिंकको गोदाम सिल गरिएको छ । सोमबार वाणिज्य विभागले चिनीको कालोबजारी गरेको आरोपमा कुलेश्वसस्थित उक्त गोदाम सिल गरेको हो ।
अनुगमनका क्रममा गोदाममा लेबल अस्पष्ट भएको चिनीको कृतिम भण्डारण गरेर राखिएको पाइएपछि गृहेश्वरी ट्रेडलिंकको उक्त गोदाम सिल गरिएको हो । हाल उक्त गोदामको चिनीको गुणस्तर परीक्षणका लागि पठाइएको छ । उक्त गोदाममा करिब ७० हजार किलो चिनी भण्डारण गरेर राखिएको अवस्थामा भेटिएको विभागले जनाएको छ ।
यसो त व्यवसायी सन्तोष खेतानको उक्त फर्मले नेपाली चिनी मिलबाट क्रसिङको समयमा सस्तोमा चिनी खरिद गरी कृतिम भण्डारण गर्ने र चाडवाडको समयमा महँगोमा बिक्री गर्ने गरेको पनि पाइएको छ ।
यतिसम्म कि खेतानको उक्त फर्मले व्यवसायीहरुलाई प्रतिकिलो १२७ रुपैयाँ होलसेलमा चिनी बिक्री गरेर १ सय ५ रुपैयाँको मात्रै बिल दिने गरेकोसमेत पाइएको छ । उक्त विषयमा यसअघि नै विभागमा उजुरी परेको विभागका एक अधिकारीले बताएका छन् । ती अधिकारीका आधारमा उक्त फर्मविरुद्ध विभागमा परेको उजुरी र सूचनाका आधारमा अनुगमन गर्दा चिनीको कृतिम भण्डारण गरेको पाइएको हो ।
खेतानको उक्त गोदामबाट ठूलो परिमाणमा भण्डारण गरेर राखिएको दाल पनि बरामद गरिएको छ । उक्त विषयमा थप अनुसन्धान भईरहेको विभागले जनाएको छ ।
