काठमाडौँ । असोज महिनामा घरजग्गा कारोबार र कित्ताकाट बढेको छ । भूमि व्यवस्थापन तथा अभिलेख विभागको तथ्यांकअनुसार गत असोजको तुलनामा चालु आर्थिक वर्षको असोजमा घरजग्गा कारोबार ४६.७६ प्रतिशत र राजस्व ३७.१२ प्रतिशतले बढेको छ भने कित्ताकाट अघिल्लो असोजको तुलनामा ८१.९७ प्रतिशत प्रतिशतले बढेको छ ।

गत साउन ३० मा मन्त्रिपरिषद् बैठकले सबै जग्गाको कित्ताकाट खुलाउने निर्णय गरेसँगै घरजग्गाको कारोबार बढेको हो । अन्य क्षेत्रमा मन्दी आएका बेला घरजग्गाको कारोबारमा खुकुलो नगरेसम्म आर्थिक चलायमान नदेखिने सरोकारवालाहरुको आवाजपछि सरकारले घरजग्गाको कारोबार केहि खुकुलो बनाएको थियो । नेपाल राष्ट्र बैंकले समेत एकिकृत निर्देशनमार्फत घरजग्गामा लगानी गर्ने सिमालाई बढाएपछि घरजग्गाको कारोबार बढेको सरोकारवालाहरुको भनाई छ ।

यता घरजग्गाको कारोबार गर्नेहरुले भने मन्दीका कारण घरजग्गाको कारोबार नबढेको भन्दा पनि घरजग्गाको कारोबारमा कमी आएकोले बजारमा मन्दी देखिएको र सो समस्या समाधान गर्न सरकार अझै गम्भीर हुनुपर्ने बताउँछन् । ‘घरजग्गाको कारोबार चलायमान भएपछि अर्थतन्त्र नै चलायमान हुन्छ । यो विषयमा सरकार गम्भीर हुन जरुरी छ ।’ घरजग्गा कारोबारी सुशील घिमिरेले अर्थ सरोकारसँग भने, ‘अलिअलि पैसा हुनेले सस्तोमा पाएको स्थिति भएका कारण घरजग्गामा लगानी गरिरहेका छन् ।’ उनका अनुसार कित्ताकाट बढ्नुको कारण भने विभिन्न खालका हुन सक्छन् । ‘अंशबण्डाका कारण पनि कित्ताकाट बढ्छ । थोरै जग्गा बेचेर व्यवहार चलाउनुपर्दा पनि कित्ताकाट बढ्छ । त्यसैले कित्ताकाट बढ्दैमा वा समग्र घरजग्गाको कारोबार बढ्दैमा अर्थतन्त्रका समस्याहरु समाधान भयो वा अर्थतन्त्र चलायमान भयो भन्न मिल्दैन ।’