काठमाडौँ । मंगलबार पनि सोनापुर मिनिरल्स एण्ड आयल लिमिटेडको सेयर मूल्यमा नेगेटिभ सर्किट लागेको छ । नेप्सेमा सूचीकृत भएर कारोबार सुरु भएको तेस्रो दिन पनि सोनापुरको सेयर मूल्यमा नेगेटिभ सर्किट लागेको हो ।
मंगलबार प्रि–ओपनिङ सेसनमा २ सय ८३ रुपैयाँ ५० पैसाबाट खुलेको सोनापुरको सेयर मूल्य १० प्रतिशतले घटेर २ सय ५५ रुपैयाँ २० पैसामा कायम भएको छ ।
यसो त दोस्रा बजारमा कारोबार सूरु भएको पहिलो दिन नै सोनापुरको सेयर मूल्यमा नेगेटिभ सर्किट लागेर ३ सय ५० रुपैयाँबाट ३ सय १५ रुपैयाँमा झरेको थियो । त्यस्तै, दोस्रो दिन पनि यसको सेयर मूल्यमा नेगेटिभ सर्किट लाग्यो । दोस्रो दिन सोनापुरको सेयर मूल्य १० प्रतिशतले घटेर ३ सय १५ बाट २ सय ८३ रुपैयाँ ५० पैसामा झरेको थियो ।
कम्पनीले प्रतिकित्ता १०० रुपैयाँ अंकित मूल्यमा १ सय ३७ रुपैयाँ ५८ पैसा प्रिमियमसहित प्रतिकित्ता २ सय ३७ रुपैयाँ ५८ पैसामा आईपीओ जारी गरेको थियो । कम्पनीको सेयर असोज ३ मा नेप्सेमा सूचीकृत भएको थियो । दोस्रो बजारमा कारोबारको पहिलो दिन कम्पनीले १ सय ४२ रुपैयाँ १ पैसादेखि ४ सय २६ रुपैयाँ ३ पैसासम्म ओपनिङ रेन्ज तोकेको थियो ।
