काठमाडौं । चाडपर्वको अवसरमा नेपाली बजारमा चिनी पर्याप्त रुपमा उपलब्ध नहुँदा समस्या परेको छ । पर्वका बेला अरु बेलाभन्दा बढी चिनी खपत हुने गरेको छ । सहज रुपमा सहुलियत दरमा चिनी नपाउँदा सामान्य उपभोक्ता प्रभावित बनेका छन् ।
त्यसैगरी, सुनसरी-मोरङ औद्योगिक क्षेत्रका बिस्कुट, चकलेट लगायत उद्योग पनि प्रभावित बनेका छन् । स्थानीय उत्पादनले नपुग्ने, सरकारले पर्याप्त आयात गर्न नसकेको अवस्था एवं निजी क्षेत्रलाई आयात गर्ने अधिकार नदिँदा चिनी अभावको अवस्था रहेको उद्योगीहरुको भनाइ छ । सोहि कारण उल्लेख्य परिणाममा चिनी खपत हुने चकलेट, बिस्कुट जस्ता उद्योगले क्षमताअनुसार उत्पादन गर्न सकेका छैनन् ।
नेपाल उद्योग परिसंघ कोशी प्रदेश अध्यक्ष पवन सारडाका अनुसार पर्वका बेला चिनी पर्याप्त रुपमा उपलब्ध नहुँदा सर्वसाधारण उपभोक्ताका साथै सुनसरी–मोरङ औद्योगिक कोरिडोरका उद्योगहरु पनि प्रभावित भएका छन् ।
भारतीय बजारमा चिनीको मूल्य ६७ रुपैयाँ छ । नेपाली बजारमा सामान्यतया किलोको १२५ सम्म पर्छ । पर्वका बेला बढी खपत हुने वस्तुहरु उत्पादन गर्ने उद्योगहरु पर्याप्त चिनी नपाउँदा समस्यामा परेको उद्योगीहरुको भनाइ छ ।
स्थानीय उत्पादनले नपुग्ने भएकाले आयातमै भर पर्नुपर्ने अवस्था हुँदा मुख्य चाडपर्वलाई लक्षित गरी एवं औद्योगिक क्षेत्रको मागलाई ध्यान दिंदै पर्याप्त रुपमा चिनी आयात गरिनुपर्नेमा त्यसो हुन नसहेको व्यवासाहीहरुको भनाइ छ ।
बिस्कुट, चकलेट, डेरी उत्पादन, मिठाइ जस्ता वस्तु उत्पादन गर्ने उद्योगहरुले क्षमताको आधा मात्र उत्पादन गर्न सकेको जनाइएको छ । कच्चा पदार्थका रुपमा चिनी समेत प्रयोग गर्दै आएका उद्योगहरुले हाल क्षमताको ५० प्रतिशत मात्र उत्पादन गर्न सकेका छन् ।
