">
काठमाडौँ । जिल्ला प्रशासन कार्यालय काठमाडौँले दुर्गा प्रसाईंलाई तीनकुनेमा आन्दोलन गर्न रोक लगाएको छ । मंसिर ८ गते (शुक्रबार) प्रसाईं समूहको आन्दोलन तीनकुनेमा गरिने भनिए पनि काठमाडौँ प्रशासनले तिनकुनेमा प्रसाईं समूहलाई आन्दोलन गर्न अनुमति नभएको बताएको हो ।
मंसिर ७ गते (बिहीबार) बल्खुको प्रदर्शनपछि प्रसाईंले पत्रकार सम्मेलनको आयोजना गर्दै आफुहरुको दोस्रो दिनको प्रदर्शन तीनकुनेमा हुने जानकारी दिएका थिए ।
तर, प्रसाईं समूहलाई तीनकुनेमा प्रदर्शन गर्न प्रशासनले रोक लगाएसँगै शुक्रबार प्रसाईंको प्रदर्शन तिनकुनेमा नहुने भएको छ । यद्यपि प्रसाईं समूहको प्रदर्शन कहाँ हुन्छ ? भन्ने अझै टुँगो भने लागेको छैन ।
मंसिर ७ गतेको दुर्गा प्रसाईं र युवा संघको आन्दोलनलाई लक्षित गर्दै प्रशासनले माइतीघरदेखि बानेश्वरसम्मको स्थानमा प्रदर्शन गर्न रोक लगाएको थियो । त्यस्तै, प्रशासनले प्रसाईंको आन्दोलनका लागि प्रदर्शन क्षेत्र बल्खु र युवा संघको आन्दोलनका लागि प्रदर्शनस्थल तीनकुने तोकेको थियो ।
मंसिर ७ को आन्दोलन सकिएपछि शुक्रबारदेखि काठमाडौँ बन्दको घोषणा गर्दै प्रसाईंले तीनकुनेमा प्रदर्शन गर्ने घोषणा गरे पनि प्रशासनले तीनकुनेमा प्रदर्शन गर्न रोक लगाएको छ ।
