काठमाडौँ । प्रदर्शनमा हिँडेका व्यवसायी दुर्गा प्रसाईंलाई प्रहरीले आधा बाटोबाटै फिर्ता पठाएको छ । मंगलबार गौशालामा आयोजना गरिएको प्रदर्शनका लागि जाँदै गर्दा प्रसाईंलाई पेप्सीकोलाबाटै प्रहरीले फिर्ता पठाएको हो ।
आफ्ना समर्थकसहित गौशाला हिँडेका प्रसाईंलाई प्रहरीले पेप्सीकोलामा रोकेर फिर्ता पठाएपछि हाल उनी ठिमीस्थित आफ्नै घरमा फर्किएका छन् ।
हाल प्रसाईंको निवासमा नेपाल प्रहरीको ‘स्पेशल टास्क फोर्स’ सहित प्रहरीको ठूलो संख्या परिचालन गरिएको छ ।
मंगलबार प्रसाईं नेतृत्वको राष्ट्र, राष्ट्रियता, धर्म, संस्कृति र नागरिक बचाउ महाअभियानले गौशालामा प्रदर्शनको आयोजना गरेको छ । प्रसाईं सोही कार्यक्रमलाई सम्बोधन गर्न गौशाला जाँदै थिए ।
सोमबार गौशालामा आयोजित प्रदर्शनमा झडप भएपछि प्रहरीले धर्मगुरु श्रीनिवास आचार्यसहित १५ जनालाई पक्राउ गरेको थियो । पक्राउ पर्नेमा प्रसाईंका स्वकीय सचिव बिनञ्जय थापा पनि रहेका छन् ।
